НыбжьыкIэхэм ягъэмэфэ зыгъэпсэфыгъо лъэхъан лъэкIуатэ. Гурыт еджапIэхэм ащызэхащэгъэ лагерьхэм анэмыкIэу къалэм дэмытхэ лагерьхэм кIонхэу АР-м IофшIэнымкIэ ыкIи социальнэ хэхъоныгъэмкIэ и Министерствэ путевкэ 2220-рэ зэригъэгъотыгъ.

Мы илъэсым турбазэу «Горная» зыфиIорэм зыщагъэпсэфынэу путевкэ 1120-рэ, хьа­кIэщ-турист комплексэу «Лань» зыфиIорэм пае путевкэ 900 аратыгъ. Джащ фэдэу АР-м гъэсэныгъэмрэ шIэныгъэмрэкIэ и Министерствэ искусствэмкIэ, спортымкIэ ыкIи наукэмкIэ сэна­ущыгъэ зыхэлъ кIэлэцIыкIухэм апае путевкэ 200 зэригъэгъо­тыгъ. Чэзыу-чэзыоу набжыкIэхэр зыгъэпсэфыпIэхэм якIуалIэх.

Лагерьхэм яапэрэ чэзыу жъоныгъуакIэм и 28-м аублагъ, нэбгырэ 775-рэ ахэм къякIолIэгъагъ, ятIонэрэм — нэбгырэ 740-мэ загъэпсэфыгъ. Шышъхьэ­Iум и 2-м къыщыублагъэу я 3-рэ сменэр рагъэжьагъ. «Лань» зыфиIорэм нэбгырэ 300, «Горнэм» нэбгырэ 300 ыкIи «Горная легенда» зыфиIорэм нэбгырэ 35-мэ защагъэпсэфы ыкIи япсауныгъэ ащагъэпытэ.

Непэрэ мафэм ехъулIэу ны-тыхэм путевки 100 ащэфыгъ. Лагерэу «Лань» зыфиIорэм ия 4-рэ чэзыу кIэлэцIыкIухэр кIуа­гъэх. Ар шышъхьэIум и 5-м аублагъ, и 25-м нэс щыIэщтых.

КIэлэцIыкIухэм языгъэпсэфыгъо лъэхъан гъэшIэгъонэу, шIуа­гъэ къытэу зэрэкIощтым зэхэщакIохэр ыуж итых. Пандемием ыпкъ къикIыкIэ лагерьхэм яIоф­шIэн нахь зэхъокIыгъэ хъугъэ. Iофтхьабзэу зэхащэхэрэм яна­хьыбэр жьы къабзэм щэкIо, зе­кIохэм ачIыпIэ тарихъ-краеведческэ зэIукIэхэр афызэхащэх.

ДЕЛЭКЪО Анет.