Iэзэгъу уцхэм ауасэхэм япхыгъэ Iофыгъохэм афэгъэхьыгъэ зэхэсыгъо АР-м и Къэралыгъо Совет — Хасэм джырэблагъэ щызэхащэгъагъ. Парламентым и Тхьаматэу Владимир Нарожнэм Iофтхьабзэр зэ­рищагъ.

Парламентым и Тхьаматэ игуа­дзэу Шъэо Аскэр, социальнэ политикэмкIэ, унагъом иIоф­хэмкIэ, псауныгъэм икъэухъу­мэнкIэ ыкIи культурэмкIэ парла­мент Комитетым ипащэу Ев­ге­ний Саловыр, уасэхэмрэ тарифхэмрэкIэ АР-м и ГъэIоры­шIапIэ, прокуратурэм, псауныгъэм икъэухъумэнкIэ Министерствэм, Роспотребнадзорым и ГъэIорышIапIэу АР-м щыIэм, нэмыкI ведомствэхэм ялIыкIо­хэр хэлэжьагъэх.

Владимир Нарожнэм иинстаграм нэкIубгъо къызэрэщитхыжьыгъэмкIэ, Iэзэгъу уцхэм ауасэ лъэшэу зэрэдэкIоягъэм фэгъэхьыгъэ тхьаусыхэу цIыф­хэм къарахьылIэхэрэр мы зэ­хэсыгъом лъапсэ фэхъугъэх. Iэзэгъу уцхэм щапIэхэм япащэу зэхэсыгъом хэлэжьагъэхэм Парламентым япащэхэмрэ депутатхэмрэ яупчIэхэм джэуап­хэр къаратыжьхэзэ къызэра­IуагъэмкIэ, уц нахь пыутхэр бэ­дзэршIыпIэм текIыхи, нахьыбэу лъапIэхэр къызэрэтена­гъэ­хэр ары лъапсэу ащ фэхъугъэр. Зыуасэ цIыкIугъэхэм аха­мы­гъэхъуагъэу, ахэр IуагъэкIынхэу къаIэкIэмыхьажьхэу ары зэраIорэр.

— Мы Iофыгъор тишъолъыр изакъоу дигъэзыжьын ылъэкIыщтэп. Ащ фэшI федеральнэ министерствэу ыкIи ведомствэу мы Iофым фэгъэзагъэхэм гумэкIыгъор алъыгъэIэсыгъэн фае. Iэзэгъу уцхэм ящапIэхэм уасэхэр зэрагъэнэфэщтхэмкIэ шапхъэу хэбзэгъэуцугъэхэм къащыдэлъытагъэхэми ягугъу тшIыгъэ. Пстэумэ ауж сенатор­хэмрэ УФ-м и Къэралыгъо Думэ идепутатхэмрэ къыхэдгъэлажьэ­хэзэ Iэзэгъу уцхэр цIыфхэм къызIэкIэгъэхьэгъошIу афэшIыгъэнхэм, ахэм ауасэ игъэIоры­шIэн нахь гъэлъэшыгъэу лъы­плъэгъэным фэгъэхьыгъэ джэ­псалъэ дгъэхьазырынэу итхъу­хьагъ, — къытхыгъ Владимир Нарожнэм.