Къушъхьэ тешъоу «Лэгъо-Накъэ» зыгъэпсэфыпIэ дэгъу хьакIэщхэр, къе­чъэхыпIэ гъогухэр, шхапIэхэр зэхэтхэу тыришIыхьанэу Адыгеир зыфэягъэр я 50 — 60-рэ илъэсхэм къащегъэжьагъ, ау къадэхъугъагъэп. Нэужым Шъачэ щыкIогъэ КIымэфэ Олимпиадэм изэхэщэни къы­хахьи ащ ишIын зэпагъэужьыгъагъ.

Бэрэ зыуж итыгъэхэ экокурортым игъэпсын 2022-рэ илъэ­сым зэрэрагъэжьэщтыр джы мыкоммерческэ акционер обществэу «Гъэхъунэ Плъыжьым» ипресс-къулыкъу къытыгъ.

Обществэм итхьаматэу Андрей Круковскэм къызэриIуа­гъэмкIэ, зыгъэпсэфыпIэм ипроекти, имастер-плани зэхагъэуцогъахэх, мы илъэсыр екIыфэ- кIэ ахэм хэхъоныгъэ-зэхъокIыныгъэхэр джыри афашIыщтых.

Горнолыжнэ курортэу агъэ­псыщтым сомэ миллиард 35-рэ пэIуагъэхьащт. Ахъщэ чIыфэр Банк-Дом РФ-м къыIахыщт. Пэ­шIорыгъэшъэу къызэралъыта­гъэмкIэ, экокурортым илъэс 15 — 20-кIэ зыкъищэфыжьынэу мэгугъэх.

Курортым хэхьащт псэуалъэ­хэм яшIын Iэхьищэу зэтеуты­гъэщт. Апэрэм хэхьащтхэр 2022 — 2024-рэ илъэсхэм Iоф зыдашIэщтхэр ары. Ахэм ахэхьэ километрэ 20 зикIыхьэгъэщт къечъэхыпIэ трассэхэмрэ номер 650-рэ зыхэтыщт хьакIэщ­хэмрэ. Трассэхэм ягъэпсын нэбгырэ минитIу фэдиз хэлэ­жьэщт.

ЯтIонэрэ Iоф Iахьхэм кIэшIэ­гъэ кIэпсэ гъогуитIурэ къушъхьэ къечъэхыпIитфырэ ахэлъытагъ, «жъогъуиплIым» къыдиштэрэ хьакIэщхэм номер 750-рэ къащызэIуахыщт. ЗэкIэмкIи эко­курортым номер минитIурэ ныкъорэ-щы фэдиз иIэщт, къу­шъхьэм къызщечъэхыхэрэ гъогухэм километрэ 36-рэ якIыхьэгъэщт.

Экокурортым ишIын тырагъэ­кIодэнэу апэ къалъытэгъагъэр сомэ миллиард 23-рэ, мы лъэ­хъаным ащ джыри миллиард 12 къыхэхъуагъ. Ар къызхэкIыгъэу къаIорэр курортым щагъэпсыщт псэуалъэхэр уахътэм къыди­штэрэ шапхъэхэм атефэхэу ыкIи заповедникым къыхиубытэрэ чIыпIэ къабзэхэм апэIудзыгъэ­хэу зэрэщытыщтхэр ары.

ЗыгъэпсэфыпIэ зэтегъэпсы­хьагъэ Адыгеим иIэ зыхъукIэ цIыфхэм яIофшIэпIэ чIыпIэхэм къахэхъощт, республикэм иэкономикэ инэу зыкъиIэтыщт. Къы­зэралъытагъэр илъэс къэс экокурортым сомэ миллиарди 3,5-рэ къылэжьынэу ары. Республикэм ибюджет сомэ миллион 400 фэдиз къыхахъоу ригъэжьэщт.

Шъаукъо Аслъангуащ.