Мыекъопэ районым и Краснооктябрьскэ псэупIэ кой иволонтерхэм шIы­хьаф ашIи псыхъоу Къурджыпс инэпкъхэр загъэкъэбзахэхэм ыуж админист­рациер къыкIэлъэIугъэу хэкI дзыо 50 фэдиз джырэблагъэ шъолъыр опера­торым дищыгъ.

«Лъэмыдж плъыжькIэ» заджэ­хэ­рэ районыр ары анахьыбэу зы­дэщыIагъэхэр. Пластикым хэшIыкIыгъэ бэшэрэбэу, хьакъу-шыкъоу, пакетэу, нэмыкIэу къаугъои­гъэр зэкIэ а чIыпIэм зыщызы­гъэпсэфыгъэхэм къыIуанагъэх. Мыщ фэдэ мэфэ фабэхэм къушъхьэ псыхъо къэбзэ дахэм зыщагъэу­чъыIэтэнэу Адыгеим ичIыопс амал къызэраритыгъэм пае джаущтэу «къагъэкIэракIи» IукIыжьыгъэх.

— Псыхъо нэпкъыр къэбзэным, зыщыбгъэпсэфыным фытегъэпсы­хьэгъэным ищыкIагъэр бэп, хэкIыр зыдыIупхыжьыныр ары ныIэп. Зыпари хьылъэ, ямышIыкIэу пшIэн фае горэ ащ хэлъэп. Ау, гухэкIыми, ар зымыгъэцакIэрэр бэ, ежьхэм ачIыпIэкIэ зыгорэм ышIэн фаеу къашIошIы. Ащ тетэу зы чIыпIэм хэкI кубометри 8 щызэIукIагъ, ар дзыо инхэу 50 фэдиз хъугъэ, — къыIуагъ ООО-у «ЭкоЦентрэм» и Адыгэ шъолъыр къутамэ ипащэу Алыбэрд Налбый.

Экологием зынаIэ тезыгъэтырэ волонтерхэм шъолъыр операторыр сыдигъокIи IэпыIэгъу афэхъу. Псы­хъо нэпкъыр, паркыр, гъэхъунэр е нэмыкI зыгъэпсэфыпIэ чIыпIэ зыгъэкъабзэмэ зышIоигъохэр диспетчерскэ къулыкъум къытеохэмэ, хэкIэу къаугъоирэр Iутщынэу ты­хьа­зыр. Телефоныр: 8-962-868-14-62.

ООО-у «ЭкоЦентрэм» и Адыгэ шъолъыр къутамэ ипресс-къулыкъу