Хэгъэгу кIоцI къулыкъум иIофышIэ ныбжьыкIэхэм ясэнэ-хьат нахь хэшIыкI фыряIэным фытегъэпсыхьагъэу Урысы­ем и МВД иуниверситетэу Краснодар дэтым иеджэ­пIэ базэ профессиональнэ ухьазырыныгъэ зыщызэрагъэгъо­тырэ факультетым щеджэхэрэр АР-м хэгъэгу кIоцI IофхэмкIэ и Министерствэ иподразделение анахь ини­тIум ащыIагъэх. Ахэм пэщэныгъэ адызэрихьагъ полицием иполковникэу Наталья Лозовскаям.

КъэIогъэн фае ведомствэмрэ егъэ­джэн гупчэмрэ япащэхэм зэгурыIоныгъэ дэгъу азыфагу илъэу Iоф зэрэзэ­дашIэрэр, ащ ишIуагъэкIэ министерствэм илIыкIохэр еджэпIэ учреждениехэм макIох, хэгъэгу кIоцI къулыкъум иIофшIэн епхыгъэу лекциехэм къяджэх.

АпэрапшIэ курсантхэр ведомствэм икинологическэ къулыкъу игупчэ щыIагъэх. ХьакIэхэм къапэгъокIыгъ полицием икапитанэу Надежда Шаяновар. Ащ игуапэу гупчэм иIофшIэн зэрэзэхэщагъэр, пшъэрылъэу ыкIи мурадэу яIэхэр къафиIотагъэх, джащ фэдэу хьэхэр зэ­рагъасэхэрэр, ахэм Iоф адэзышIэхэрэм шIыкIэу агъэфедэхэрэм ащигъэгъоза­гъэх.

Iофтхьабзэм хэлэжьагъэх АР-м хэ­гъэгу кIоцI IофхэмкIэ и Министерствэ епхыгъэу Iоф зышIэрэ Общественнэ советым итхьаматэ игуадзэу Николай Киселевыр, Адыгеим хэгъэгу кIоцI къулыкъум иветеранэу, кинологическэ къулыкъум игъэпсын иIахьышIу хэзы­шIыхьагъэу Юрий Мидинициныр. Полицием икъулыкъушIэхэм къызэра­IуагъэмкIэ, мы мафэм ехъулIэу гупчэм хьэ 20-м ехъу щаIыгъ. Общественнэ рэ­хьатныгъэм икъэухъумэн ыкIи бзэ­джашIэхэм язещэн фэгъэзагъэх нэмыц овчаркэхэр. Хьэ лъэпкъэу лабрадорхэр наркотикхэр хэбзэнчъэу къезыгъэкIо­кIыхэрэм, къэорэ пкъыгъохэм, Iашэхэм ялъыхъун хагъэлажьэх.

Хэбзэ рэхьатныгъэр къэухъумэгъэнымкIэ къулыкъушIэхэм курсантхэм нэ­рылъэгъу афашIыгъ бгъэфедэ мыхъущт веществохэм якъэгъотынкIэ ыкIи бзэджашIэхэм якъэубытынкIэ хьэхэр зэрагъэфедэхэрэр.

Ветеранхэу Н. Киселевым ыкIи Ю. Ми­динициным къулыкъушIэ ныбжьыкIэхэм къафаIотагъ охътэ зэфэшъхьаф­хэм кинологхэр хъугъэ-шIэгъэ гъэшIэ­гъонэу зэрихьылIагъэхэр, бзэджэшIэгъэ хьылъэхэм якъыхэгъэщынкIэ хьэхэм яшIогъэшхо къызэрэкIорэр.

Нэужым ведомствэм иэкспертнэ-­криминалистическэ гупчэ курсант ныбжьыкIэхэр рагъэблэгъагъэх. Ащ ипащэу Станислав Клименкэм яIофшIэнкIэ япшъэрылъхэм, джащ фэдэу экспертизэу ыкIи ушэтынэу ашIыхэрэр зыфэдэхэм ащигъэгъозагъэх. Дактилоскопическэ учетым иIофшIэн хьакIэхэр щигъэгъозагъэх, химическэ лабораторием щыIагъэх, ахъщэ нэпцIыр къызэрэчIэбгъэщын плъэкIыщт шIыкIэу щыIэхэр арагъэлъэгъугъэх.

КIэухым Общественнэ советым илIыкIохэм къызэрэхагъэщыгъэмкIэ, мыщ фэдэ Iофтхьабзэхэм мэхьанэшхо яI, полицейскэ ныбжьыкIэхэм теориер зэ­рэзэрагъашIэрэм имызакъоу, ясэнэхьат ылъэныкъокIи шIэныгъэу арагъэгъотырэм ишIогъэшхо къэкIо.