Хъугъэ-шIэгъэ 40 агъэунэфыгъ
Статистикэм къызэритырэмкIэ, 2021-рэ илъэсым имэзихэу пыкIыгъэм лъэсрыкIохэр зыхэт гъогу хъугъэ-шIэгъэ 40 фэдиз Адыгеим игъогухэм къатехъухьагъэу агъэунэфыгъ.
Ахэм нэбгыри 8 ахэкIодагъ, нэбгырэ 32-мэ шъобжхэр атещагъэхэ хъугъэ. Хъугъэ-шIэгъэ 19-р лъэсрыкIо зэпырыкIыпIэхэм ащыхъугъ, нэбгырэ 19-мэ шъобжхэр атещагъэхэ хъугъэ.
Гъогу хъугъэ-шIэгъэ 40-м щыщэу 18-м лъэсрыкIохэм ялажьэ хэлъэу агъэунэфыгъ. Аужырэ хъугъэ-шIагъэр зыхъугъэр шышъхьэIум и 4-м сыхьатыр 17.30-р ары. ПэшIорыгъэшъэу зэрагъэунэфыгъэмкIэ, Мыекъопэ районым щыщ хъулъфыгъэу илъэс 30 зыныбжьым автомобилыр ыгъэIорышIэзэ, Мыекъуапэ щыщ бзылъфыгъэу илъэс 39-рэ зыныбжьым амыгъэунэфыгъэ чIыпIэм гъогур щызэпичызэ риутыгъ. Бзылъфыгъэм шъобжхэр тещагъэхэу сымэджэщым ащагъ. Мы IофымкIэ Мыекъуапэ и ГИБДД уплъэкIунхэр регъэкIокIых, хъугъэ-шIагъэм лъапсэ фэхъугъэр зэрагъашIэ.
Адыгеим и Къэралыгъо автоинспекцие икъулыкъушIэхэм водительхэм агу къегъэкIыжьы автомобилым тхьамыкIагъо къыпыкIын зэрилъэкIыщтыр. ЗэпырыкIыпIэхэм сакъыныгъэ къыщызхагъэфэнэу, псынкIащэу автомобилыр зэрамыфэнэу, лъэсрыкIохэм гъогур зэпачыфэ яжэнхэу къяджэх.