Мы илъэсым имэзи 7-у блэкIыгъэм гъогум дэчъэхыгъэхэу хъугъэ-шIэгъэ 33-рэ Адыгеим щагъэунэфыгъ. Ахэм нэ­бгыри 5 ахэкIодагъ, нэбгырэ 40-м шъобжхэр атещагъэхэ хъугъэ.

ШышъхьэIум и 8-м мафэм сыхьатыр 2-м такъикъ 35-кIэ ежьагъэу автомобиль гъогоу «Мыекъуапэ — Джаджэ — Псыбай — Зеленчукская — ­Карачаевск» зыфиIорэм, Кощхьэблэ районым иIэгъо-блэгъухэм адэжь, аварие щыхъугъ. ПэшIорыгъэшъэу зэра­гъэунэфыгъэмкIэ, Краснодар щыщ илъэс 33-рэ зыныбжь бзылъфыгъэм машинэр фэмыгъэIорышIэжьэу игъогу дэчъэхи зэпыригъэзагъ. Мы хъугъэ-шIагъэм ыпкъ къикIэу автомобилым исыгъэ нэбгыритIумэ шъобжхэр атещагъэхэу сымэджэщым ащагъэх.

Мыщ ехьыщыр аварие шышъхьэIум и 6-м мы район дэдэм щыхъугъ. Краснодар краим щыщ хъулъфыгъэу илъэс 20 зыныбжьыр IэкIыб къэрал къыщашIыгъэ автомобилым исэу игъогу дэчъэхи зэпыригъэзагъ. Води­телым къыдисыгъэ пшъэшъэжъыеу ­илъэс 24-рэ зыныбжьыр мы аварием хэкIодагъ.

Адыгеим и Къэралыгъо автоинспекцие мы хъугъэ-шIэгъитIумкIэ уплъэ­кIунхэр зэхищагъэх.

ГИБДД-м иIофышIэхэр джыри зэ цIыфхэм къяджэх гъогухэм сакъыныгъэ къыщызхагъэфэнэу, гъогурыкIоным ишапхъэхэр амыукъонхэу.