КIуай Марзет, зипсауныгъэ пыч фэхъугъэ кIэлэцIыкIухэмрэ ибэу е лъыплъэн имыIэу къэнагъэхэмрэ зыщаIыгъхэ еджэпIэ-интернатэу Шэуджэн районым итым иIофышI. - КоронавирусыкIэм пэшIуекIорэ вакцинэр сытемыщыныхьэу ыкIи семыхъырэхъышэу зыхязгъэлъхьагъэхэм сащыщ. НэмыкIэуи а уз мэхъаджэм зызэрэщыуухъумэн мы уахътэм щыIэп сшIошIы. Коронавирусыр сэ къысэолIагъэп, ау сигупсэхэм ыгъэсымэджагъэхэр ахэтых, къинэу алъэгъугъэм сыщыгъуаз. Арышъ, ар сэри сшэтэнэу сыфаеп, сиIахьыл-гупсэхэм джыри зэ къямыолIэжьынэу сафэсакъыныри шIокI зимыIэ Iофэу сэлъытэ. ЕтIани тэ кIэлэцIыкIухэм Iоф адэтэшIэ, ахэми тафэсакъын  фае. Вакцинэр къысэгоуагъэп пIоми хъущт. Апэрэ Iахьымрэ ятIонэрэмрэ азыфагу къыдэорэ уахътэм пэтхъу-Iутхъур къысэолIэгъагъ, ау умысакъымэ ащ фэдэ къыхэхьан зэрилъэкIыщтыр врачхэм къаIоу ыпэкIэ зэхэсхыгъагъэти, сыкъыгъэщтагъэп. Ари псынкIэу текIыгъ. Зыпарэми сэ сишIошI къаигъэкIэ езгъэштэнэу сыпылъэп, шъхьадж ежь зэреплъ, ау коронавирусыкIэу дунаир зэлъызыкIугъэр зэрэщынагъор нафэ, вакцинэм нэмыкI ущызыухъумэни щыIэп.