Лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм ишIуагъэкIэ мы илъэсым Iоныгъом ыкIэм нэс Тэхъутэмыкъое районым пхырыкIырэ автомобиль гъогухэм яIахьитф зэтырагъэпсыхьащтых.

Автомобиль гъогоу «Тэхъутэмыкъуай – Новый – Козэт – Яблоновскэр» зыфиIорэм ичIыпIитIумэ мы уахътэм гъэцэкIэжьынхэр ащэкIох, ахэм километри 2 ыкIи 1 якIыхьагъ. IофшIэнхэр зэрэлъы­кIуатэхэрэр ауплъэкIу «Адыгеяавтодорым» испециалистхэм.

Гъогухэм ягъэкIэжьын фэгъэзагъэр пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Тэхъутэмыкъое ДРСУ-р» ары. ГъэцэкIэжьынхэм зэкIэмкIи сомэ миллион 23,9-рэ апэIуа­гъэхьащт.

Мы илъэсымкIэ агъэцэкIэжьын фэе псэуалъэхэм ащыщэу къуаджэу Псэйтыку екIолIэрэ гъогум иIахьэу метрэ 900 хъурэр, поселкэу Инэм екIуалIэ­рэм икилометрэ 1,6-рэ агъэцэкIэжьыгъэх.

«Суповскэр – Отраднэр» зыфиIорэ автомобиль гъогум икилометри 2,66-м, джащ фэдэу Инэмрэ БжыхьэкъоякIэмрэ зэзыпхырэм иIахьэу километрэ 1,2-рэ хъурэм шышъхьэIум гъэцэкIэжьынхэр ащыкIощтых.

Лъэпкъ проектым амалэу къытыхэрэр къызфагъэфедэзэ, 2021-рэ илъэсым Iоныгъом ыкIэм нэс километри 8,9-рэ зикIыхьэгъэ гъогухэр районым щызэтырагъэпсыхьащтых, квадратнэ метрэ мин 58-рэ фэдизмэ асфальт атыралъхьащт.