Урысые партиеу «Единэ Россием» игъэкIотыгъэ гъэцэкIэжьынхэр зищыкIэгъэ шъолъырхэм ащыIэ еджапIэхэм яреестрэ зэхигъэуцуагъ ыкIи УФ-м просвещениемкIэ и Министерствэ ар IэкIигъэхьагъ.

КъызэраIуагъэмкIэ, еджапIэхэм ягъэцэкIэжьын зэрэлъы­кIуатэрэм лъыплъэгъэным фэIорышIэщт Гупчэ ведомствэмрэ партиемрэ зэхащэщт, ащ иIофшIэн экспертхэр ыкIы ны-тыхэр къыхагъэлэжьэщтых.

Непэрэ мафэм ехъулIэу проектнэ-сметнэ документацие зыгъэхьазырыгъэ еджапIэхэр апэ рагъэшъыхэзэ агъэцэкIэ­жьынхэ зэрэфаер къыхигъэ­щыгъ ФедерациемкIэ Советым иапэрэ вице-спикерэу, партием и Генсовет и Секретарэу Андрей Турчак УФ-м просвещениемкIэ иминистрэу Сергей Кравцовымрэ шъолъырхэм ащыIэ гъэ­сэныгъэм иучреждениехэм япащэхэмрэ заIокIэм.

— ИгъэкIотыгъэ гъэцэкIэжьынхэр зищыкIэгъэщт еджапIэхэм яреестрэ зэхэдгъэуцуагъ. Джы пшъэрылъ шъхьа­Iэу щытыр тызэгъусэу ащ джыри тыхэплъэныр, зэдгъэфэныр ыкIи къихьащт илъэсым телъытэгъэ бюджетым ипроект аштэным ыпэкIэ ащ зэхъокIыныгъэхэр зыщыфашIырэ уахътэм мы программэм игъэцэкIэн пэIухьащт ахъщэр къыдыхэлъытэгъэныр ары, — къы­Iуагъ Андрей Турчак.

Мы Iофыгъом изэшIохынкIэ еджапIэхэм япащэхэм, ны-тыхэм якомитетхэм яеплъыкIэ бэ зэрепхыгъэр, ар къыдалъытэзэ тапэкIэ IофшIэныр зэрэзэхащэщтыр партием илIыкIо къыIуагъ. Мыщ дэжьым анахьэу анаIэ зытырагъэтыщтыр къоджэ псэупIэхэм адэт гурыт еджапIэхэм ягъэцэкIэжьын ыкIи язэтегъэ­псыхьан ары.