ПIэлъэ гъэнэфагъэхэр зиIэ пшъэрылъхэр
УФ-м и Президентэу Владимир Путиным стратегическэ хэхъоныгъэхэмкIэ ыкIи лъэпкъ проектхэмкIэ Советым изэхэсыгъоу блэкIыгъэ мазэм зэхищэгъагъэм зигугъу щашIыгъагъэхэм къафигъэзэжьызэ, УФ-м и Правительствэ ыкIи шъолъыр пащэхэм пIэлъэ гъэнэфагъэхэр зиIэ пшъэрылъхэр джырэблагъэ къафишIыгъэх.
ЕджапIэхэм ящэнэрэ сменэхэр ямыIэжьынхэм, кIэлэцIыкIу IыгъыпIэхэр ягъэгъотыгъэнхэм, зигъот макIэхэм IэпыIэгъу ятыгъэным, нэмыкIхэм ахэр афэгъэхьыгъэх.
Пстэумэ апэу зигъот макIэхэм ахэхьэрэ купхэм хахъоу яIэ хъурэм зэпымыоу лъыплъэнхэу, IэпыIэгъоу ящыкIагъэр арагъэгъотынэу Правительствэм пшъэрылъ фишIыгъ.
Джащ фэдэу 2023 — 2024-рэ илъэсхэм еджапIэхэм ящэнэрэ сменэхэр ямыIэжьынхэм Правительствэмрэ шъолъырхэм яхэбзэ гъэцэкIэкIо органхэмрэ Iоф дашIэн фае. ЕджапIэхэм Интернетыр икъоу аIэкIэхьаными ыуж итынхэу къариIуагъ.
Къэралыгъом ипащэ унашъоу къышIыгъэхэм ащыщ 2026-рэ илъэсым нэс гъэсэныгъэм епхыгъэ псэолъэ 7300-рэ гъэкIэжьыгъэнхэр. Ахэм азыныкъор 2022 — 2023-рэ илъэсхэм хагъэкIын фае.
2023-рэ илъэсым ыкIэм нэс кIэлэцIыкIу IыгъыпIэ зищыкIагъэхэм зэкIэми арагъэгъотынэуи Президентым пшъэрылъ къышIыгъ.
2022-рэ илъэсым общественнэ транспортым игъэкIэжьын Урысыем щырагъэжьэщт. Ари къэралыгъом ипащэ иунашъохэм зэу ащыщ.
Апэрэ медицинэ IэпыIэгъум епхыгъэу цIыфхэм яшIоигъоныгъэхэр къыдэлъытэгъэнхэм, непэ зымыгъэразэхэрэр дэгъэзыжьыгъэнхэм афэшI ащ игъэкIэжьын къыхэгъэлэжьэгъэнхэу Правительствэм фигъэпытагъ.
УФ-м и Правительствэрэ Гупчэ Банкымрэ унэе псэупIэхэм яшIынкIэ фэгъэкIотэнхэр зиIэ ипотекэр гъэфедагъэ зэрэхъущтым Iоф дашIэнэу пшъэрылъ яI.
2023-рэ илъэсым ыкIэм нэс «Чистая страна» зыфиIорэ проектым хэлэжьэрэ къалэхэм хэкIитэкъупIэхэр адахыжьынхэу Владимир Путиным пшъэрылъ къышIыгъ. Мыхэм ягъунапкъэхэм хэкIитэкъупIэу афашIыгъэхэр зэрэIуахыжьхэрэм лъыплъэнхэу Президентым иполномочнэ лIыкIохэр фигъэзагъэх.
Джащ фэдэу инфраструктурэм игъэпсынкIэ проектхэм япхырыщын пае бюджетым къыхэхыгъэ кредитхэр къаратынхэм ищыкIэгъэ тхылъхэр охътабэ тырамыгъашIэу къагъэхьазырынхэу шъолъыр пащэхэм къафигъэпытагъ.