Сымэджэщым чIэлъхэм ежьхэм къащэфыгъэ е шIушIэ фондхэм къафатIупщыгъэ Iэзэгъу уцхэмкIэ яIэзэнхэм ифитыныгъэ яIэ хъугъэ.

Джынэс клиникэхэм, сымэ­джэщхэм ачIэлъхэм медучреждением къаримытыгъэ Iэзэгъу уц арахьылIагъэу агъэунэфы­гъэу щытмэ, тазыр мымакIэу атыралъхьэщтыгъ.

ШIокI зимыIэ медицинэ страхованиер зэрыгъозэрэ шапхъэ­хэм зэхъокIыныгъэ афишIыгъ УФ-м псауныгъэр къэухъумэгъэ­нымкIэ и Министерствэ къыдигъэкIыгъэ унашъом. А зэхъокIыныгъэхэм джы амал къаты Iэзэгъу уц лъапIэхэр шIушIэ фондхэм сымэджэщым къыфа­тIупщынышъ, сымэджэ гъэнэфагъэу ар зищыкIагъэм рахьылIэ­нэу.

Ары, щыIэныгъэм бэрэ цIыф­хэр щырехьылIэх сымэджэ хьылъэм рахьылIэн фэе Iэзэгъу уц лъапIэр зыфэдэр ашIэу, ау ащ фэдэ сымэджэщым къырамытэу. Джащыгъум ежь сыма­джэри, ащ игупсэхэри шIыкIэ зэфэшъхьафхэм яусэнхэ фаеу мэхъу.

«Ежьхэм къащэфыгъэхэр, ягупсэхэм къагъотыгъэ Iэзэгъу уцхэр сымэджэщхэм ачIэлъхэм арахьылIэнхэ фитынхэм бэшIагъэ зытегущыIэхэрэр, анахьэу адэбз уз зиIэхэм, — еIо онкологие зиIэ цIыфхэм я Ассоциациеу «Здравствуй!» зыфиIорэм ипрезидентэу Ирина Борововам. – Урысыем щамытхыгъэ препарат лъапIэхэм ар афэгъэхьыгъэн ылъэкIыщт. ЦIыфым ипсауныгъэ изытет елъытыгъэу, ащ фэдэ Iэзэгъу уц лъапIэхэр врачебнэ комиссиер ары зыгъэ­нафэхэрэр. Ащ фэдэ Iэзэгъу уцыр къащэфэу, къэралыгъом ар къырагъэуалIэу, сымэджэщым къынэсыфэ сыд фэдиз уахът тешIэщтыр?! Сымаджэм ар джыры зищыкIагъэр нахь неущэп, мазэ тешIэмэ арэп. Ащ фэдэ хъумэ, шIушIэ фондхэм яшIуагъэ къагъакIо, апэрэ мафэхэм, тхьамафэм — Iэзэгъу уцыр къащэфэу, сымэджэщым къэсыфэ фикъун фэдиз къаратэу мэхъу, Iэзэныр зэпымыуным лъэплъэх. Ау врачхэр ащ фэдэ IэпыIэгъум зезэгъыхэкIэ, бырсыр къыпыкIын ылъэкIыщтыгъ, регламентыр аукъощтыгъ».

«Урысыем псауныгъэр къэу­хъумэгъэнымкIэ и Министерствэ ышIыгъэ унашъор лъэшэу ищыкIагъ, игъу, — еIо сэкъатныгъэ зиIэхэм – «рассеянный склероз» зыфиIорэ узыр къызэузыгъэхэм я Общероссийскэ общественнэ организацие ипрезидентэу Ян Власовым. — Мары, гущыIэм пае, «окрелизумаб» зыцIэ препаратыр лъэшэу ящыкIагъ «рассеянный склероз» зыфаIорэр зиIэхэм. Ахэм ащыщхэм а Iэзэгъу уцыр игъом амыгъотымэ, сэкъат хъущтых псынкIэу, ядунаий шIэхэу ахъожьыщт. Препаратыр лъэпIэ дэд, венэмкIэ ар араты, сомэ миллионым ехъу ащ ыуас, медучреждениехэм къаIукIэрэп. Сымаджэм ар ыщэфын амал иIагъэми е шIушIэ IэпыIэгъу къезытын къэхъугъэми, стационарым ар къыщыпхалъхьанэу къыбдэхъуныр IэшIэхыгъэп».

Ащ къызэрэхигъэщырэмкIэ, ахэм афэдэ Iэзэгъу уц лъэпIэ дэдэхэр федеральнэ программэу «14 высокозатратных нозологий» зыфиIорэм къызэрэдилъы­тэу къащэфыгъэу е шIушIэ фондэу «Круг добра» зыцIэм къытIупщыгъэу щытми, стационарым ахэр щыбгъэфедэнхэ амал къэгъотыгъоягъ, унашъоу зигугъу тшIырэм пэрыохъухэр зэкIэ щегъэзыех.

Ау а унашъор медучреждениехэм ежьхэм яфедэ хэлъэу къызфагъэфедэн алъэкIыщтба? Ахэм сымаджэхэм араIоу ауб­лэщтба ежь-ежьырэу Iэзэгъу уцхэр къащэфынхэу? «ШъуищыкIэгъэ Iэзэгъу уцыр тиIэп, шъор- шъорэу къэшъущэф» аIоу хъущтхэба?

«Арэущтэу хъун ылъэкIыщтэп, — еIо пациентхэм я Всероссий­скэ союз итхьамэтэгъоу Юрий Жулевым. — Законодательствэу щыIэм къызэрэщиIоу, ОМС-мкIэ Iэзэгъу уцхэр сымаджэхэм ягъэ­гъотыгъэныр сымэджэщым ипшъэ­рылъэу щыт».

Жулевым къызэрэхигъэщырэмкIэ, сымаджэм арэущтэу къыдэзекIуагъэхэу страховой медицинэ организацием е шIокI зимыIэ медицинэ страхованиемкIэ Фондым тхьаусыхэ тхылъ зигъэхьыкIэ, медучреждением тазыр тыралъхьащт, цIыфым иахъщи къырырагъэтыжьыщт. Ащ зэрилъытэрэмкIэ, цIыфхэм яфитыныгъэхэр нахь чанэу къаухъумэнхэ фае, гузэгъабгъэ а Iофым къыхэкIыным щыщы­нэнхэу щытэп.

Мыщ дэжьым экспертхэм къыхагъэщы зы чIыпIэ зэкIэми анаIэ тырагъэтын зэрэфаер. «ЦIыфым ежь-ежьырэу зэригъэ­гъотыгъэ препаратыр шапхъэхэм адиштэу аIыгъыгъэмэ, температурэу ар зыщыпIыгъыщт чIыпIэм иIэн фаер мыукъогъагъэмэ уицыхьэ телъын фае. Сыда пIомэ ахэм афэдэ Iэзэгъу уцхэм янахьыбэр «высокотоксичнэ препаратхэм» ахэхьэх, ахэр зэраIыгъхэрэм мэхьанэшхо иI. Ащ епхыгъэ Iофхэри тэрэзэу гъэзекIогъэнхэ фае, сымаджэхэри щыбгъэгъозэнхэу щыт Iофым щынагъоу хэлъым, сыда пIомэ препаратэу цIыфым халъхьэрэмкIэ пшъэдэкIыжь зыхьырэр врачыр ары», — еIо Ян Власовым.

Ирина Борововам зэрилъы­тэрэмкIэ, а Iэзэгъу уцхэр къыздикIыхэрэр пхъашэу уплъэкIугъэнхэ фае. «Ахэр препарат лъапIэх. Официальнэу а Iэзэгъу уцхэр сымаджэм къызыIукIэ­хэкIэ, GR-кодыр ууплъэкIун, ар зэрэIэзэгъу уц тэрэзыр бгъэунэфын плъэкIыщт. Ау цIыфым ар ИнтернетымкIэ къыщэфыгъэ зыхъукIэ, гъэпцIакIохэри уцым идэгъугъи гъэунэфыгъуае хъущт».

Арышъ, унашъор аштагъ, ащ къыкIэлъыкIоу къэуцурэ упчIэхэм яджэуапхэри зэхэфыгъэнхэу щыт. Мыр ищыкIэгъэ лъэныкъом­кIэ апэрэ лъэбэкъоу экспертхэм алъытэ.