Экологием ишапхъэхэр къыдэлъытагъэхэу гъэ­псыгъэщт зыгъэпсэфыпIэу (экокурорт) «Лэгъо-Накъэ» фэгъэхьыгъагъ зэхэсыгъоу Адыгеим щыкIуагъэр.

Ащ хэлэжьагъэх АР-м и Премьер-министрэу Геннадий Митрофановыр, «Красная Поляна» зыфиIорэ компаниеу курортыр зышIыщтым, Кавказскэ заповедникым япащэхэр, УФ-м чIыопсым икъэкIуапIэхэмкIэ ыкIи экологиемкIэ и Минис­терствэ, Краснодар краим иад­министрацие ялIыкIохэр, нэмыкIхэр.

ЧIыопсым икъэухъумэн ишапхъэхэр къыдэлъытагъэхэу эко­курортыр гъэпсыгъэ зэрэхъущтым, республикэм зекIоным зыщегъэушъомбгъугъэнымкIэ амалышIоу иIэхэм лъэныкъохэр зэдытегущыIагъэх.

НАО-у «Красная Поляна» зыфиIорэм ипащэу Андрей Круковскэм гъэпсэфыпIэр зэрэ­шIыгъэщтым ипроектэу пэшIорыгъэшъэу агъэхьазырыгъэм нэIуасэ къыфишIыгъэх. ЧIы­о­псым зэрар къыфэмыхьыгъэным пае проектым узэдытегущыIэным мэхьэнэшхо зэриIэр ащ къыкIигъэтхъыгъ.

— Курортыр дунэе природнэ кIэным изы псэуалъэ игъунапкъэхэм адэжь щыгъэпсыгъэщт. Арышъ, тыкъэзыуцухьэрэ дунаим тиягъэ етымыгъэкIыныр пстэумэ апшъэ тэшIы. Сетьхэмрэ «линейнэ псэуалъэхэмрэ» автомобиль ыкIи лъэсрыкIо гъогоу пхырыщыгъахэхэм ащытшIыщтых, горнолыжнэ трассэр кIымэфэ уахътэу осыр куоу зы­­щытелъыр арышъ зыпхыращырэр, чIыгум иягъэ ригъэкIыщтэп, — къыIуагъ ащ.

Адыгеим зекIоным зыщегъэу­шъомбгъугъэным мэхьэнэшхо зэриIэр, республикэм социальнэ-экономическэ хэхъоныгъэхэр ышIынхэмкIэ экокуротым ишIуа­гъэ мымакIэу къызэрэкIощтыр къыхигъэщыгъ АР-м и Премь­ер­министрэ. Горнолыжнэ курорт иIэным лъэныкъуабэмкIэ Адыге­ир зэрэфытегъэпсыхьа­гъэр, чIы-пIэу зыдэщысыри, Уры­сыем и Къыблэ шъолъыр икъэлэшхохэм зэрапэчыжьэри ащ зэрэ­фэ­Iоры­шIэхэрэр къыкIигъэтхъыгъ.

— Мы проектым ишIуагъэкIэ IофшIэпIэ чIыпIэ минитIу фэдиз щыIэ хъущт, зекIоным федэшхо къыкIэкIощт. Курортым туриз­мэм илъэныкъо зэрэгъэпсыгъэр зэрэзэрихъокIыщтым имыза­къоу, тишъолъыр иэкономики хэхъоныгъэшхохэр ригъэшIыщтых. ЗекIоным зызэредгъэу­шъомбгъурэм дакIоу экологиеми тынаIэ тет. Къыхэзгъэщымэ сшIоигъор сыд фэдэ псэолъэшIын IофшIэнри чIыопсым икъэу­хъумэн къыдэлъытагъэу зэшIо­хыгъэныр Адыгеим ипащэхэм шIокI зимыIэ шапхъэу къагъэ­на­фэхэрэм зэу зэращыщыр ары, — къыIуагъ Геннадий Мит­рофановым.