Адыгэ Республикэм хэдзынхэмкIэ и Гупчэ комиссие и Тхьаматэу Сэмэгу Нурбый тыгъуасэ журналистхэм аIукIагъ. УФ-м и Къэралыгъо думэ ыкIи Адыгеим и Къэралыгъо Совет — Хасэм идепутатхэм яхэдзынхэм шъолъырыр зэрэфэхьазырым, непэрэ мафэм ехъулIэу кандидатхэу атхыгъэхэм япчъагъэ зыфэдизым, нэмыкI Iофыгъохэм ар къатегущыIагъ.

Ащ къызэриIуагъэмкIэ, нэмыкI субъектхэм афэдэу хэдзынхэр Iоныгъом и 17 — 19-м республикэм щыкIощтых. Эпидемио­логием ылъэныкъокIэ Iоф­хэм язытет къызэрыкIоу зэрэщымытым къыхэкIэу мэфищым къыкIоцI цIыф­хэм амакъэ атын алъэ­кIы­нэу унашъо ашIыгъ. Пчэдыжьым сыхьатыр 8-м щегъэжьагъэу пчыхьэм сыхьатыр 8-м нэс хэдзыпIэ участкэхэм япчъэхэр зэIухыгъэщтых.

Адыгеир пштэмэ, зыма­къэ зытын зылъэкIынэу щатхыгъэр нэбгырэ мин 339-м ехъу. Непэрэ ма­фэм ехъулIэу УФ-м и Къэралыгъо думэ идепутат хъунэу кандидатипшIымэ зыкъагъэлъэгъуагъ, ахэр партие зэфэшъхьафхэм ялIыкIох. Ахэм ащыщэу нэбгыри 3-м регистрациер акIугъ, кандидати 4-мэ ядокументхэм ахэплъэх, нэбгыри 3-мэ ищыкIэгъэ тхьапэхэр Гупчэ комис­сием къырахьылIагъэхэп.

Адыгеим и Парламент идепутат хъунхэмкIэ кандидат 488-рэ къагъэлъэгъуагъ. Мы уахътэм ехъу­лIэу ахэм ащыщхэр атхыгъэх, адрэхэм ядокументхэм ахэплъэх.

— Хэбзэгъэуцугъэм диштэу кандидатхэм зара­гъэтхынымкIэ, тхьапэхэу ищыкIагъэхэр игъом агъэ­хьазырынхэмкIэ IэпыIэгъу тафэхъу. Мы аужырэ илъэсхэр пштэхэмэ, хэ­дзынхэмкIэ культурэм на­хьышIум ылъэныкъокIэ зызэблихъугъ. Джащ фэдэу мы кампанием ныб­жьыкIабэ зэрэхэла­жьэрэм мэхьанэшхо иIэу сэлъытэ, — къыIуагъ Сэмэгу Нурбый.

Iоныгъом и 17 — 19-м хэдзыпIэ участкэ 266-мэ республикэм Iоф щашIэщт, ахэм ащыщхэм видео тезыхырэ камерэхэр ачIэтыщтых. Дунаир зэлъызыкIугъэ коронавирусым пэшIуекIогъэным ыкIи хэ­дзынхэр щынэгъончъэнхэм афэшI санитар шапхъэхэу щыIэхэр агъэцэ­кIэнхэм анаIэ тырагъэ­тыщт. ХэдзыпIэ пстэуми медицинэм иIофышIэхэм дежурствэр ащахьыщт. Зымакъэ зытынэу къы­чIахьэхэрэм нэгуихъохэр, Iалъэхэр аратыщтых, джащ фэдэу ятемпературэ ашыщт, псэуалъэхэр дез­инфекцие ашIыщтых. Мы Iофыгъохэм язэшIохын со­мэ миллиони 6-м ехъу пэIуагъэхьащт.