АР-м хэдзынхэмкIэ и Гупчэ комиссие мы мафэхэм зэхэсыгъоу иIагъэм Iофыгъо 15-мэ ащытегущыIагъэх. ДжырэкIэ пшъэрылъ шъхьаIэр партие зэфэшъхьафхэм къагъэлъэгъуагъэхэ кандидатхэр агъэнэфэнхэр ары. КъырахьылIэгъэ тхылъхэр хэбзэгъэуцугъэм дештэхэмэ комиссием хэтхэм ауплъэкIугъэх, нэужым нэбгырэ пэпчъ ымакъэ фитызэ игъоу алъэгъугъэх.

Iофтхьабзэм ипэублэ яенэрэ зэIугъэкIэгъумкIэ Урысые Федерацием и Федеральнэ ЗэIукIэ и Къэралыгъо Думэ Адыгэ РеспубликэмкIэ кандидатэу зыкъэзыгъэлъэгъогъэ зы нэбгырэм итхылъхэр зэрэмытэрэзыр раIуагъ, ахэр къыгъэтэрэзыжьыхэмэ икIэрыкIэу икандидатурэ хэплъэжьыщтых.

АР-м и Къэралыгъо Совет — Хасэм идепутатынымкIэ Мые­къуапэкIэ зы мандат зиIэ хэдзыпIэ коеу N 8-м Денис Пантюховыр, джащ фэдэу Красногвардейскэ ыкIи Теуцожь районымкIэ зы мандат зиIэ хэдзыпIэ коеу N 7-мкIэ Надежда Притыки кандидатэу атхыгъэх. Теуцожь районымкIэ зы мандат зиIэ хэдзыпIэ коеу N 24-мкIэ КIыкI Аслъан, МыекъуапэкIэ зы мандат зиIэ хэдзыпIэ коеу N 15-мкIэ Александр Шевчукрэ Сергей Погодинымрэ, Тэхъутэмыкъое районымкIэ зы мандат зиIэ хэдзыпIэ коеу N 20-мкIэ Талъэкъо Казбек, МыекъуапэкIэ зы мандат зиIэ хэдзыпIэ койхэу N 12-мрэ ыкIи N 13-мрэ Рафаэль Авакимянрэ Сергей Гукасянрэ къагъэлъэгъуагъэх. Ахэм кандидат зэрэхъугъэхэр къэзыушыхьэтхэрэ тхылъхэр аратыжьыгъэх. Iофтхьабзэм нэмыкI Iофыгъохэми ахэплъагъэх.

ДЕЛЭКЪО Анет.