Урысые телевизионнэ ыкIи радиокъэ­тын сетым (РТРС) илъэс 20 зэрэхъурэр шышъхьэ­Iум и 13-м хигъэунэфыкIыщт. Урысыем и Президент и Указэу N 1031-р зытетэу 2001-рэ илъэсым къыдэкIыгъэм тетэу РТРС-р зэхащэгъагъ. Стратегическэ пшъэрылъхэм язэшIохын ар фытегъэпсыхьэгъагъ: къэралыгъо теле- ыкIи радиосетьхэм япроизводственнэ-технологическэ комплекс зыкI зэхэщэгъэныр, ахэр гъэкIэжьыгъэнхэр, гъэфедэгъэнхэр ыкIи хэхъоныгъэ ягъэшIыгъэныр.

2021-рэ илъэсым Урысыем ителекоммуникациехэмкIэ РТРС-р IофшIэн язытыхэрэм анахь дэгъукIэ алъытэгъагъ.

2010-рэ илъэсым телерадиокъэтынхэмкIэ федеральнэ программэм тегъэ­псыхьагъэу РТРС-м дунаим зынахь ин темыт цифровой телесеть ыгъэпсы­гъагъ. Станцие 5040-рэ сетым хэхьэ ыкIи абонентыпкIэ хэмылъэу эфирнэ телеканал 20-мэ яплъынхэ амал хэгъэгум щыпсэухэрэм къареты.

2001-рэ илъэсым къыщегъэжьагъэу РТРС-м икъутамэу «Адыгэ Республикэм и РТПЦ» зыфиIорэр предприятием иструктурэ хэхьэ. Непэ нэбгырэ 54-мэ а къутамэм Iоф щашIэ. Станцие 15-мэ яцифровой телесеть республикэм щыпсэ­ухэрэм япроцент 99,96-м амал къареты каналыбэ къызфагъэфедэнэу. Федеральнэ цифрэ программэхэм анэфэшъхьафэу ГТРК «Адыгея» зыфиIорэм иблокхэм телеканалхэу «Россия 1», «Россия 24» зыфиIохэрэмкIэ яплъынхэу тицIыфхэм амал яI. Джащ фэдэу каналэу «ОТР»-мкIэ Мыекъопэ телевидением икъэтынхэм яплъых. Республикэм ипсэупIэ 11-мэ адэсхэр «Радио России» зыфиIорэм къытыхэрэм ядэIух.

Хабзэм ифедеральнэ ыкIи ишъолъыр къулыкъухэм яфэныкъоныгъэхэмкIэ фэIо-фашIэхэр нахьыбэ ышIынхэр РТРС-м имурадхэм ащыщ. Лъэпкъ программэу «Цифровая экономика» зыфиIорэм зэшIуихыхэрэ IофтхьабзэхэмкIэ ащ фэдэ предприятиер къызэрэзыфагъэ­федэн алъэкIыщтри нэрылъэгъоу щыт. Социальнэ мэхьанэ зиIэ псэуалъэхэмрэ чыжьэу пэIудзыгъэ псэупIэхэмрэ апае илъэсиплIым къыкIоцI РТРС-м ипсэуа­лъэхэм базовэ станцие минитIум ехъу ащагъэпсыщт.

РТРС-м иамалхэр къызфагъэфедэнхэ алъэкIыщт ошIэ-дэмышIагъэ зыхэлъ тхьамыкIагъохэмкIэ цIыфхэм макъэ арагъэIунымкIэ, джащ фэдэу къаIэ­кIэхьэрэ материалхэм Iоф адэшIэгъэнымкIэ.

2018-рэ илъэсым къыщыублагъэу ВГТРК-м ирадиохъытыу ипсэолъэ 1200-рэ фэдиз РТРС-м зэтыригъэпсыхьагъ. НепэкIэ Адыгэ Республикэм щыпсэу­хэрэм япроцент 62-мэ амал яIэ хъугъэ къэралыгъо радиопрограммэхэм ядэIунхэмкIэ.

Предприятием ия 20-рэ илъэс зыщыхигъэунэфыкIыщтым Биробиджан, Благовещенскэ, Калининград, Калугэ, Шъачэ, Челябинскэ ыкIи нэмыкI къалэхэм ятелебашнэхэм мэфэкI архитектурнэ-художественнэ теплъэ зиIэ пкъыгъохэр къащагъэнэфэщтых. Останкинэ телебашнэм чэщ-зымафэм къыкIоцI къыщагъэлъэгъощтых шIуфэс открыткэхэмрэ цифрэ телевидением илоготипэу щыт «хьампIырашъомрэ».