«Ресурсым» хэхьэрэ агропредприятиехэм аIутхэм лъэшэу гухэкI ащы­хъугъ псэолъэшI компанием ивице- президентэу, игенеральнэ директо­рэу Даур Юрэ Ас­лъан ыкъом COVID-19-р къы­зеутэлIэ нэуж бэ темы­шIэу ыныбжь илъэс 47-м итэу шы­шъхьэIум и 4-м идунай зэрихъожьыгъэр.

Даур Юрэ 1999-рэ илъэсым ишэкIогъу ОАО-у «Адыгхлебопродукт» зыфиIорэм лэжьэныр щыригъэ­жьагъ, мы Iахьзэхэлъ обществэм иучасткэ ипащэу Iоф ышIэзэ, 2005-рэ илъэсым ишышъхьэIу «Ресурсым» хэхьагъ.

Ащ Iоф зишIэгъэ илъэсхэм компанием хэхъоныгъэшхо ышIыгъ, пэрытныгъэ Урысые Федерацием щызыIыгъхэм ахэуцуагъ.

Даур Юрэ цIыф нэгушIоу, ыгу зэIухыгъэу щытыгъ, сэмэркъэушхо хэлъыгъ, Iоф дэзышIэхэрэм лъытэныгъэшхо къыфашIыщтыгъ.

Рабочэ къызэрыкIоу ригъажьи, «Ресурсым» ипсэолъэшI компание ивице-президент, игенеральнэ директор IэнатIэхэм ар анэсыгъ, Адыгеим хэхъоныгъэ егъэшIыгъэным ишъыпкъэу фэлэжьагъ.

«Ресурсым» хэхьэрэ агропредприятиехэм аIутхэр Даур Юрэ ятэу Аслъан, щымыIэжьым ишъхьэгъусэ, ыкъохэм афэтхьаусыхэх, якъин адагощы. «Ресурсым» хэхьэрэ агропредприятиехэм яIофышIэхэр