ЕджапIэм чIэсэу е мыгъэ чIэхьанэу сабый зиIэхэм, ахэр илъэсыкIэ еджэгъум фагъэхьазырынхэм пае илъэсэу тызхэтым ишышъхьэIу ма­зэ зэтыгъо ахъщэ IэпыIэгъоу нэбгырэ пэпчъ сомэ мин пшIырыпшI фэ­гъэ­кIогъэным кIэщакIо фэхъугъэр УФ-м и Президентэу Владимир Путиныр ары.

Унашъоу зыкIэтхагъэм тетэу, шышъхьэIум и 16-м къыщыу­благъэу къатIупщынэу рагъэ­жьэнэу ары зэрэщытыгъэр, ау Владимир Путиным джыри зэ мы Iофым къыфигъэзэжьи пIалъэр къызэкIахьанышъ, на­хьыжьэу ахъщэхэм ятын рагъэ­жьэнэу пшъэрылъ къышIыгъ.

ШышъхьэIум и 2-м мы къэралыгъо IэпыIэгъум итын ра­гъэжьагъ. Ащ илъэси 6-м зыныбжь ехъугъэу, 18-м шIомыкIыгъэ кIэлэцIыкIухэр ары ха­фэхэрэр. Нахь тэрэзэу къэпIон зыхъукIэ, 2021-рэ илъэсым иIоныгъо и 1-м нахь мыкIасэу зыныбжь илъэси 6 хъугъэхэмрэ унашъор къызщыдэкIыгъэ уахътэм (ар бэдзэогъум и 2-р ары) джыри 18-м нэмысыгъагъэхэмрэ ары. Ным е тым ыцIэ­кIэ ахъщэр къэкIощт.

Джащ фэдэу илъэс 18 — 23-рэ зыныбжьэу сэкъатныгъэ зиIэр е зипсауныгъэ пыч фэ­хъугъэр гъэсэныгъэм ипрограммэ шъхьаIэхэмкIэ еджэхэрэм ащыщмэ, гурыт еджапIэм чIэмысыми, ахъщэр къыратыщт.

ШышъхьэIум и 2-м, апэрэ мафэу ахъщэхэм ятIупщын зыщырагъэжьагъэм, УФ-м Пенсие­хэмкIэ ифонд и Къутамэу АР-м щыIэм сомэ миллион 565-рэ мин 260-рэ ытIупщыгъ. Ащ кIэлэцIыкIу 56526-рэ къыхиубытагъ. Ар зэратынэу зытефэхэрэм япроцент 85-рэ мэхъу.

УФ-м ПенсиехэмкIэ ифонд и Къутамэу АР-м щыIэм ипресс-къулыкъу