Адыгэхэм ыкIи абхъазхэм ижъыкIэ агъэфедэщтыгъэ ыкIи зэрэзекIощтыгъэхэ къу­хьэу зэтырагъэуцожьыгъэр КъокIыпIэм щыпсэурэ лъэпкъ­хэм яискусствэ и Къэралыгъо музей икъутамэу Мыекъуапэ дэтым къыщагъэлъэгъуагъ.

Культурэр, искусствэр, тарихъыр зышIогъэшIэгъон цIыфыбэ къэгъэлъэгъоным къе­кIолIагъ.

Хъарзынэщ гъэтхъыгъэу щыIэхэр къызфагъэфедэзэ къухьэр Петрозаводскэ ща­шIыгъ. СурэтышIэу Батал Джапуа Урысыем ыкIи Тыркуем къащатхыжьыщтыгъэ ­къэ­бархэр, сурэтхэр, советскэ ыкIи абхъаз шIэныгъэлэжьхэм яушэтынхэр къызфигъэфедэхэзэ абхъаз къухьэр зэрэщытыгъэм игъэтхъыгъэхэр ыгъэхьазырыгъэх. Ащ икIы­хьагъэр метрэ 14,5-рэ мэхъу, ишъомбгъуагъэ метри 2,5-рэ фэдиз, нэбгырэ 50 ефэ, зы сыхьатым километрэ 12 — 14 ыкIун ылъэкIыщт.

Къухьэр Абхъазым ащэжьыным ыпэкIэ Адыгеим икъэлэ шъхьаIэ къезыщэлIагъэхэр ыкIи мы Iофтхьабзэм кIэщакIо фэхъугъэхэр сурэтышIэу Батал Джапуа, Абхъазым щэрыонымкIэ иклубэу «Афырхы» зыфиIорэм ипащэу Адгур Какоба ыкIи этнопаркэу «Апсны» ипроект иавторэу Мзауч Пилия.

Тарихълэжьхэм ыкIи зекIохэм къызэ­ратхыжьырэмкIэ, лIэшIэгъуитIукIэ узэкIэIэ­бэжьмэ хышIуцIэ Iушъом Iус адыгэхэм (ша­псыгъэхэм) къухьэхэр агъэфедэщтыгъэх, рызекIощтыгъэх.

Адыгэ Республикэм и ЛIышъхьэу КъумпIыл Мурат иинстаграм нэкIубгъо къызэрэщитхыгъэмкIэ, адыгэхэм ыкIи абхъазхэм ятарихъ къегъэлъагъо тятэжъ пIашъэхэм материальнэ культурэ бай зэряIагъэр. Адыгеим щы­псэухэрэм къухьэр зэрагъэлъэгъун, ащ къэ­барэу пылъыр зэрагъэшIэн амал зэряIагъэм республикэм ипащэ мэхьанэшхо реты. Мы проектым икIэщакIохэм ар афэрэзагъ.