Лъэпкъ проектэу «Псауныгъэм икъэухъумэн» зыфиIорэм игъэцэкIэн къыдыхэлъытагъэу со­мэ миллион 45,1-рэ зыосэ мобильнэ Iэзэ­пIэ-профилактическэ комплексих Адыгеим къыIэкIэхьагъ. Къоджэ псэупIэхэм адэсхэм апэрэ медико-санитар IэпыIэгъур ягъэгъоты­гъэным ахэр фэIорышIэщтых.

Адыгэ Республикэм и ЛIы­шъхьэу КъумпIыл Мурат ипшъэ­рылъкIэ медицинэ комплексхэм яIункIыбзэхэр тыгъуасэ аратыжьыгъэх. Ахэр муниципалитетхэм атегощэгъэнхэм фэгъэ­хьыгъэ Iофтхьабзэм хэлэжьагъэх Адыгеим и Къэралыгъо Совет — Хасэм и Тхьаматэу Владимир Нарожнэр, УФ-м и Къэралыгъо думэ идепутатэу Хьасанэкъо Мурат, АР-м псауныгъэр къэухъумэгъэнымкIэ иминистрэу Мэрэтыкъо Рустем, врач шъхьаIэхэр ыкIи район сымэджэщхэм яIофышIэхэр.

Мэрэтыкъо Рустем къызэри­IуагъэмкIэ, мы мобильнэ ком­п­лексхэм яIофшIэн псынкIэу ра­гъэжьэщт. Ащ фэдэ зырыз аIэкIэхьащт Кощхьэблэ, Тэхъу­тэмыкъое, Красногвардейскэ районхэм ыкIи Адыгэкъалэ дэт сымэджэщым. Мыекъопэ районым ратыщт комплексэу «Лаборатория рентгенодиагностическая передвижная» зыфиIорэр (маммографыр). Джащ фэ­дэу агъэкощырэ стоматологическэ медицинэ комплексым Iоф ришIэщт Адыгэ республикэ клиническэ цэхэм зыщяIазэхэрэ поликлиникэм.

«Диагностика» зыфиIорэ комплексым электрокардиографхэр, дефибрилляторхэр, непэрэ шапхъэхэм адиштэрэ оборудованиер, цIыфхэр уплъэ­кIугъэнхэмкIэ ыкIи диспансе­ризациер акIунымкIэ ищыкIагъэр зэкIэ къыдыхэлъытагъэх.

Мобильнэ комплексхэм яшIуа­гъэкIэ, чыжьэу пэIудзыгъэхэ псэупIэхэм адэсхэми шэпхъэшIухэм адиштэрэ медицинэ IэпыIэгъур арагъэгъотын, диагностикэр арагъэкIун, анализхэр арагъэтынхэ, специалистхэр упчIэжьэгъу афэхъунхэ амал щыIэщт.

Урысыем и Президентэу Владимир Путиным апэрэ медицинэ IэпыIэгъум исистемэ гъэкIэжьыгъэным фытегъэпсы­хьэгъэ пшъэрылъхэу къыгъэуцу­гъэхэр гъэцэкIэгъэнхэмкIэ рес­публикэм Iофышхо щашIэ. Гу­хэ­лъэу щыIэмкIэ, медицинэ тех­никэр, мобильнэ комплекс­хэр, медоборудованиер рес­публикэм джыри къыIэкIэхьащтых.

Адыгеим и ЛIышъхьэ мы Iофыгъохэм ынаIэ атет ыкIи лъэпкъ проектхэм, нэмыкI федеральнэ ыкIи шъолъыр программэхэм амалхэу къатыхэрэр къызфигъэфедэзэ, медицинэ фэIо-фашIэхэм ягъэцэкIэн нахьышIоу зэхэщэгъэнымкIэ рес­публикэм псауныгъэр къэу­хъумэгъэнымкIэ и Министерствэ пшъэрылъ гъэнэфагъэхэр фишIыгъэх. Джащ фэдэу къуа­джэхэм Iоф ащызышIэщтхэ кадрэхэм ягъэхьазырын анаIэ тырагъэтынэу, комплексхэр псэупIэхэм зэрэкIощтхэм яграфик егупшысэнхэу, пэшIоры­гъэшъэу ауплъэкIухэрэ цIыфхэм япчъагъэ нахьыбэ ашIынэу къа­риIуагъ.

Адыгэ Республикэм и ЛIышъхьэ ипресс-къулыкъу