КIэлэцIыкIухэм ягъэмэфэ зыгъэпсэфыгъо гъэшIэгъонэу, шIуагъэ пы­лъэу зэрэкIощтым Iофыгъоу епхыгъэхэр сыдигъокIи Адыгеим зэри­фэшъуашэу щызэшIуахых. Илъэс къэс ахэм апае зыгъэпсэфыпIэ чIы­пIэхэр къафызэIуахых.

АР-м IофшIэнымкIэ ыкIи ­социальнэ хэхъоныгъэмкIэ и Министерствэ къызэрэщыта­IуагъэмкIэ, мы илъэсым зэкIэмкIи зыгъэпсэфыпIэ чIыпIэ 94-рэ къызэIуахыгъагъ, ащ хэ­хьэх мафэрэ Iоф зышIагъэхэ лагерьхэр, ахэр анахьэу гурыт еджапIэхэр ары зыща­гъэпсы­гъа­гъэхэр. Ахэм анэмыкIэу къалэм дэдзыгъэ лагерищым кIэлэцIыкIухэм зызща­гъэ­псэфы ыкIи япсауныгъэ ща­­гъэ­пытэ.

КIэлэцIыкIухэр къалэм дэмытхэ лагерьхэм кIонхэу АР-м IофшIэнымкIэ ыкIи социальнэ хэхъоныгъэмкIэ и Минис­терствэ путевкэ 2220-рэ зэригъэгъотыгъ. Анахьэу анаIэ зытырагъэтырэр зянэ-зятэ зимы­Iэжь, унэгъо Iужъу-хэм ыкIи лъэкI макIэ зиIэ унагъохэм къарыкIхэрэ сабый-хэр арых. Мы илъэсым турбазэу «Горная» зыфиIорэм зы­щагъэпсэфынэу путевкэ 1120-рэ, хьакIэщ-турист комп­лексэу «Лань» зыфиIорэм пае путевкэ 900-рэ аратыгъ. Джащ фэдэу АР-м гъэсэныгъэмрэ шIэныгъэмрэкIэ и Министерствэ искусствэмкIэ, спортымкIэ ыкIи наукэмкIэ сэнаущыгъэ зы­хэлъ кIэлэцIыкIухэм апае путевкэ 200 зэригъэгъотыгъ. Чэзыу-чэзыоу «Горная леген­да» зыфиIорэм ахэм зыщагъэ­псэ­фы.

— КIэлэцIыкIухэм языгъэ­псэфыгъо уахътэ жъоныгъуакIэм и 28-м Адыгеим щыра­гъэжьагъ. Мы илъэсым пандемием ыпкъ къикIыкIэ лагерьхэм яIофшIэн зэхъокIыгъэ хъугъэ. Санитарнэ-эпидемиологическэ шапхъэхэм адиштэу Iоф ашIэ, Iофтхьабзэхэм янахьыбэр жьы къабзэм хэтхэу афызэхащэ. 2021-рэ илъэсым кIэлэцIыкIухэм языгъэпсэфыгъо лъэхъан пэIухьанэу сомэ мин 55 030,0-рэ агъэнэфагъ, — еIо АР-м IофшIэнымкIэ ыкIи социальнэ хэхъоныгъэмкIэ иIофышIэу Саида Стрикачевам.

Лагерьхэм яапэрэ чэзыу жъоныгъуакIэм и 28-м аублагъ, нэбгырэ 775-рэ ащ къекIолIэ­гъагъ, ятIонэрэм нэбгырэ 740-мэ загъэпсэфыгъ. ШышъхьэIум и 2-м къыщегъэжьагъэу я 3-рэ сменэр рагъэжьагъ. «Лань» зы­фиIорэм нэбгырэ 300, «Горнэм» нэбгырэ 300 ыкIи «Горная легенда» зыфиIорэм нэ­бгырэ 35-мэ защагъэпсэфы ыкIи япсау­ныгъэ ащагъэпытэ.

Непэрэ мафэм ехъулIэу ны-тыхэм сомэ миллиони 2-рэ мин 478-рэ зытефэгъэ путевки 100 ащэфыгъ. Лагерэу «Лань зыфиIорэм ия 4-рэ поток кIэлэцIыкIухэр кIуагъэх. Ар шы­шъхьэIум и 5-м аублагъ, и 25-м нэс щыIэщтых.

Кэшбэк программэм къы­дыхэлъытагъэу кIэлэцIыкIухэм языгъэпсэфыгъо лъэхъан пае путевкэм тефэгъэ ахъщэм ипроцент 50 къыгъэзэжьынэу «Еди- нэ Россием» игукъэкIыкIэ унашъо ашIыгъ. Сайтэу «Мир путешествий» зыфиIорэм кIэлэцIыкIу лагерьхэм афэгъэхьыгъэ разделым лагерьхэу «Лань» ыкIи «Горнэр» хэтых. Мы программэмкIэ зэкIэмкIи путевкэ 29-рэ ащэфыгъ. «Горнэм» щызэхащэгъэ ящэнэрэ чэзыум пае путевкитIу ыкIи «Лань» зыфи­Iорэм ящэнэрэ потокым пу­тевки 10, я 4-рэ чэзыум пае путевкэ 17 ащэфыгъ.

Непэрэ мафэм ехъулIэу къэ­ралыгъо системэм иплатформэ путевкэм ыуасэ ызыныкъо къа­ратыжьынэу нэбгыритIумэ ятхылъ къаIукIагъ. Путевкэхэр мэлылъфэгъум и 24-м ащэ­фыгъагъэх. ДжырэкIэ ащ епхыгъэ тхылъхэм язэхэфын ыуж итых. ХэбзэIахьхэмкIэ Федеральнэ къулыкъум изэфэхьысыжьхэм яжэх. Ящэнэрэ чэзыур аухыгъ, кэшбэккIэ путевкэхэр зыщэфыгъэхэ ны-тыхэм ятхылъхэр мы мафэхэм къырахьылIэх.