ЦIыфхэм ящынэгъончъагъэ къыдалъытэзэ
БлэкIыгъэ 2020-рэ илъэсыр ары Урысыем щыпсэухэрэм якIэтхыкIыжьын зыщыIэнэу агъэнэфэгъагъэр, ау зэпахырэ узэу дунаир зэлъызыкIугъэм ыпкъ къикIыкIэ ар лъагъэкIотэнэу хъугъагъэ.
Къэралыгъо статистикэмкIэ Федеральнэ къулыкъум Краснодар краимкIэ ыкIи Адыгэ РеспубликэмкIэ и ГъэIорышIапIэ тызэрэщигъэгъозагъэмкIэ, джы мыгъэ чъэпыогъум и 1-м щегъэжьагъэу и 31-м нэс ар кIощт.
ГухэкIми, коронавирусыкIэр джыри зэкIэкIожьыгъэп, къызэузырэр бэ. Ащ фэшI, мыгъи кIэтхыкIыжьыным изэхэщакIохэм цIыфхэм ящынэгъончъагъэ къыдалъытагъ. КIэтхыкIыжьыным къэралыгъо фэIо-фашIэхэм япортал къызфэбгъэфедэзэ ухэлэжьэн плъэкIынэу ашIыгъ.
Мы шIыкIэм шIогъабэ зэрэпылъым ГъэIорышIапIэм къыщыкIагъэтхъы. ГущыIэм пае, тыдэ ущыIэми, чэщыми, мафэми, Интернетыр къыпIэкIахьэу щытмэ, ори уиунагъо исхэри узэдыхэлэжьэн плъэкIыщт. ЕтIани уикъэбар зыгорэм IэкIэхьанымкIэ ар щынэгъончъэу щыт.
Порталыр къызэIупхэу, ищыкIагъэр зэкIэ зиптхэрэм ыуж уиунэ е унэгъо хъызмэтым апае хэушъхьафыкIыгъэу QR-код ыкIи унагъом исым пэпчъ иунаеу пчъагъэхэмкIэ зэхэтэу код къыпфэкIощт. Росстатым илIыкIоу кIэтхыкIыжьыным пае къакIорэм ахэр ебгъэлъэгъунхэ фае. ИнтернетымкIэ о птхыгъэу Росстатым ибазэ дэхьагъэхэр икIэрыкIэу кIэтхыкIыжьыгъэ мыхъунхэм фэшI ар ищыкIагъ.
НахьыпэкIэ зэрэщытыгъэ шIыкIэм тетэу хэлэжьэныр нахьышIоу зылъытэхэрэр «переписчикым» ежэнхэ е участкэу зыщыкIатхыкIыжьыхэрэм екIолIэн фае.
Джащ фэдэу мыгъэ мэкъумэщ кIэтхыкIыжьыныри къэралыгъом щызэхащагъ. ШышъхьэIум и 1-м рагъэжьагъэу и 31-м нэс кIощт.
Къэралыгъо статистикэмкIэ Федеральнэ къулыкъум Краснодар краимкIэ ыкIи Адыгэ РеспубликэмкIэ и ГъэIорышIапIэ къызэрэщытаIуагъэмкIэ, АдыгеимкIэ мэкъумэщ-фермер хъызмэтшIапIэу е унэе предпринимателэу 125-рэ, мыкоммерческэ товариществэу 100 фэдиз, унэгъо хъызмэт мин 93-м ехъу ащ хэлэжьэщт. Мэкъумэщ кIэтхыкIыжьыным зэхъокIыныгъэу мы отраслэм фэхъугъэхэр къыгъэлъэгъощтхэу, хэхъоныгъэхэр ышIынхэм пае зэшIохыгъэн фаехэр къыгъэнэфэщтхэу ары къызэраIорэр.
ПэшIорыгъэшъ зэфэхьысыжьхэр илъэсэу тызхэтым ияплIэнэрэ мэзищ Росстатым къышIыщтых. КIэтхыкIыжьыным къыгъэлъэгъуагъэр теубытагъэ хэлъэу къызиIощтыр 2023-рэ илъэсым иапэрэ мэзищ ары.
Статистикэм пылъхэм мэкъумэщ кIэтхыкIыжьыныр зэрэкIорэм, чъэпыогъум щыIэщтым зызэрэфагъэхьазырырэм инстаграм нэкIубгъор, ар @stat_adyg, къызфагъэфедэзэ цIыфхэр ащагъэгъуазэх.
Хъут Нэфсэт.