УФ-м и Президентэу Владимир Путиным пшъэрылъэу къышIыгъэм те­тэу гъэстыныпхъэ шхъуантIэр ыпкIэ хэмылъэу унэе псэупIэхэм ара­щэлIэным пае цIыфхэм ялъэIу тхылъхэр аштэнхэу Адыгеим щыра­гъэжьагъ.

«Газпром газораспределение Майкоп» зыфиIорэ ком­паниер ары ахэр зыугъоихэрэр. Шъолъыр штабым къызэрэщыхагъэщыгъэмкIэ, АР-м и Премьер-министрэу Геннадий Митрофановым шапхъэу мы Iофым пылъхэр цIыфхэм икъоу алъагъэIэсынхэу муниципальнэ образованиехэм афигъэпытагъ.

— Президентыр кIэщакIо зы­фэхъугъэ Iофыгъом ишIуагъэкIэ участкэ мин 16 фэдизмэ гъэстыныпхъэ шхъуантIэр зэрякIо­лIэщтым имызакъоу, газ хъыз­мэтыр зэрэщытэу гъэкIэжьыгъэ хъущт. ЦIыфхэм лъэIу тхылъэу къатыхэрэм къапкъырыкIыгъэу ар зэрафащэщтыр къыдэлъы­тагъэу, Iофым хэлъыр икъоу алъыгъэIэсыгъэн фае, — къы­Iуагъ Правительствэм ипащэ.

Социальнэ газификацием узэрэхэлэжьэщтым шапхъэу пылъхэр:

— физическэ лицэхэр ары ныIэп мыщ къыхиубытэхэрэр; — унэе псэупIэр, чIыгу Iа­хьыр е псэуалъэу цIыфым ­ригъэжьагъэр ежь зэриунаер къэзыушыхьатырэ тхылъыр Iэ­кIэлъын; — гъэстыныпхъэ шхъуантIэр бизнесым паеу щымытэу, иунэе хъызмэт зэрэщигъэфедэщты- ри къыушыхьатын; — газрыкIуапIэу псэупIэр зэпызычырэм унэр пэблэгъэн фае.

Къуаджэм, селом е поселкэм пэблагъэу СНТ щытмэ, ащ игъунапкъэ нэс газрыкIуапIэр зынагъэсыщтыр.

Гъэстыныпхъэ шхъуантIэр ыпкIэ хэмылъэу унэе псэупIэхэм ящэлIэгъэным фэгъэхьыгъэ программэм къыдыхэлъытагъэу газификациемкIэ ЗыкI портал агъэпсы. Ащ лъэIу тхы­лъыр щыптын, нэ­мыкIэу ищыкIагъэр щызэбгъэшIэн, Iофхэр зэрэлъыкIуатэ­хэрэм ущылъыплъэжьын плъэ­кIыщт.

Джащ фэдэу фэIо-фашIэхэм ягъэцэкIэнкIэ ЗыкI гупчэм уекIуалIэмэ хъущт. Ащ иадрес: къалэу Мыекъуапэ, урамэу Апшеронскэр, 4. «Газпром газораспределение Майкоп» зыфиIорэ компанием икъутамэу къыппэблагъэм зыфэб­гъазэми IэпыIэгъу къыпфэхъущтых.

ЛъэIу тхылъыр зэрэгъэпсыгъэщтыр интернет нэкIубгъоу adyggaz.ru зыфиIорэм ибгъо­тэщт, ащ ищыкIагъэр иптхэмэ, электроннэ почтэмкIи бгъэхьын плъэкIыщт. Адресыр: DGZ@adyggaz.ru

Телефонэу упчIэхэм джэуап­хэр къызэраратыжьыщтыр: 8-800-200-66-04.