ИлъэситIукIэ узэкIэIэбэжьмэ, АР-м и Къэралыгъо Совет — Хасэм изэхэсыгъохэм ащыщ цIыфым ипсауныгъэ лъэшэу зиягъэ езыгъэкIырэ уц шIоеу амброзием игъэкIодын нахь чанэу дэлэжьэнхэу къызщиIорэ джэпсалъэу республикэ къэралыгъо ыкIи чIыпIэ зыгъэIорышIэжьыпIэ хэбзэ органхэм, зэкIэ цIыфхэм афэгъэзагъэр щаштэгъагъ.

Нэужым ар гъэцэкIагъэ зэ­рэхъурэм зыщагъэгъозэнэу Пар­ламентым ипащэхэм му­ниципальнэ образованиехэр къакIухьагъэх, зэIукIэгъухэр ашIыгъэх, Iофыгъохэм зэхэсыгъохэм ащатегущыIагъэх.

ГъэрекIо зэпахырэ узым зы­зэриушъомбгъурэм ыпкъ къи­кIыкIэ, мы IофшIэнхэр къызэтырагъэуцонхэ фаеу хъугъагъэ, ау мыгъэ джыри къыфагъэзэ­жьыгъ. Зэхэсыгъоу республикэ Парламентым щыкIуагъэр ары зыфэгъэхьыгъагъэр. Ащ и Тхьаматэу Владимир Нарожнэм Iофтхьабзэр зэрищагъ.

АР-м мэкъумэщ хъызмэтымкIэ, псауныгъэм икъэухъу­мэнкIэ иминистерствэхэм, «Россельхозцентрэм» и Къутамэу АР-м щыIэм, Роспо­требнадзорым АР-мкIэ и ГъэIорышIапIэ, нэмыкIэу мы Iофым фэгъэзэгъэ къулыкъухэм ыкIи ведомствэхэм ялIыкIохэр ащ хэлэжьагъэх.

Амброзием игъэкIодын епхыгъэ Iофтхьабзэхэр муниципальнэ образованиехэм зэращы­зэшIуахыхэрэм ылъэныкъокIэ Iоф­хэр нахьышIу зэрэхъугъэхэр зэхэсыгъом къыщыхагъэщыгъ. «Россельхозцентрэм» и Къута­мэу АР-м щыIэм ипащэ къы­зэриIуагъэмкIэ, гъэрекIо ащ испециалистхэм лэжьыгъэ хьа­сэхэр къакIухьэгъагъэх, ам­брозиер зымыгъэкIодыгъэхэм пшъэ­дэкIыжь зэрахьыщтыр къыз­щиIорэ тхылъхэр афагъэ­хьыгъагъэх. Ащ ыуж чIыгулэжьхэм лэжьыгъэр зытырахыжьырэм уц шIоим зыкъыщимыштэным пае ищыкIагъэр арашIы­лIагъ. А IофшIэнхэм яшIуагъэ къэкIуагъ, мыгъэ амброзиеу шъофхэм къарыкIагъэр нахь макI.

— Зыпари мышIэгъахэу пIо­нэу щытэп, ау игъом ыкIи икъоу мы лъэныкъомкIэ зи­пшъэрылъхэр зымыгъэцакIэ­хэрэр джыри щыIэх, псэупIэхэр, хьасэхэр къэпкIухьэхэмэ ар нафэ мэхъу, — къыIуагъ республикэ Парламентым и Тхьаматэу Владимир Нарожнэм. — Коронавирусым цIыфхэр зэрафэлъэкIэу ебэных, ащ джыри мы уц шIоим зэрарэу къыхьырэр къыхэхъожьы.

Псауныгъэм икъэухъумэнкIэ Министерствэм илIыкIоу зэхэсыгъом хэлэжьагъэм къызэрэхигъэщыгъэмкIэ, цIыфэу ал­лергие зиIэм ар нахь лъэшы зыщыхъугъэ уахътэм коронави­русым пэшIуекIорэ прививкэр ышIы хъущтэп. Амброзием джы­дэдэм иуахът, ащ ыгъэ­сымаджэрэр бэ. Ахэм вакци- нэр зыхалъхьан алъэкIырэп.

Къэралыгъо Советым — Ха­сэм и Тхьаматэ игуадзэу Шъэо Аскэр къызэгущыIэм амброзием пэшIуекIорэ Iофтхьабзэхэр икъоу зэрэзэшIуамыхыхэрэм пае «Единэ Россием» и Шъо­лъыр общественнэ приемнэу ежь зипащэм тхьаусыхэу цIыф­хэм къырахьылIэрэр зэрэбэр къыхигъэщыгъ.

— Амброзиер игъом изы­мыупкIыхэрэм ахьыщт пшъэдэ­кIыжьэу законым къыщыдэлъытагъэхэм псэупIэ койхэм япащэхэр икъоу зэращымы­гъуазэхэм иягъэ къэкIо, — къы­Iуагъ ащ. — Тазырхэр макIэхэп, арышъ, законым фитыныгъэу къытыхэрэр агъэфе­дэхэмэ, уц шIоим игъэкIодын пымылъыр нахь макIэ зэрэхъущтыр нафэ. Муници­пальнэ образованиехэр нахь чанэу мы Iофым пы­лъынхэ фае, цIыфым ипсау­ныгъи, мэкъумэщ чIыгухэми иегъэшхо зэраригъэкIырэр зыщытэшъумыгъэгъупш.

Iофыгъоу джыри щыIэхэм къапкъырыкIыхэзэ, уц шIоим пэшIуекIорэ Iофтхьабзэу Пар­ла­ментым рихьыжьагъэхэр лъа­гъэкIотэнхэу, муниципальнэ об­разованиехэм якъэкIухьан падзэжьынэу, джэпсалъэу аштагъэр джыри зэ пащэхэм афагъэхьыжьынэу, зэпстэумэ икъоу ар алъыгъэIэсыгъэным фэшI къэбар жъугъэм иамалхэри къыхагъэлэжьэнхэу зэхэсыгъом щызэдаштагъ.

ХЪУТ Нэфсэт.