АР-м хэдзынхэмкIэ и Гупчэ комиссие ия 117-рэ зэхэсыгъо мы мафэхэм иIагъ. Iофыгъо 15-мэ ащ ащытегущыIагъэх, партие зэфэшъхьафхэм къагъэлъэгъогъэ кандидатхэр агъэнэфагъэх. Зэхэсыгъор зэрищагъ АР-м хэдзынхэмкIэ и Гупчэ комиссие и Тхьаматэу Сэмэгу Нурбый.

Яенэрэ зэIугъэкIэгъумкIэ Урысые Федерацием и Федеральнэ ЗэIукIэ и Къэралыгъо Думэ Адыгэ РеспубликэмкIэ зы мандат зиIэ хэдзыпIэ коеу N 1-м партиеу КПРФ-м — Евгений Саловыр, ЛДПР-м Евгений Груниныр къагъэлъэгъуагъ, хэдзэкIо купым хэсхэм ахэм адырагъэштагъ.

Зы кандидатым итхьапэхэр мытэрэзэу къыхагъэ­щыгъ, мэфэ заулэкIэ ахэр ыгъэтэрэзыжьыхэмэ, икандидатурэ атхыщт.

АР-м и Къэралыгъо Совет — Хасэм идепутатынымкIэ МыекъуапэкIэ зы мандат зиIэ хэдзыпIэ коеу N 12-м Иван Бормотовыр кандидатэу къагъэлъэгъуагъ. Джащ фэдэу Шэуджэн районымкIэ зы мандат зиIэ хэдзыпIэ коеу N 25-мкIэ Къэгъэзэжь Муратрэ Амурэ Азэматрэ. МыекъуапэкIэ зы мандат зиIэ хэдзыпIэ коеу N 15-мкIэ Елена Москаленкэр, МыекъуапэкIэ зы мандат зиIэ хэдзыпIэ коеу N 16-мкIэ Владимир Тростенецкэр, Кощхьэблэ районымкIэ зы мандат зиIэ хэдзыпIэ коеу N 4-мкIэ Шэуджэн Тимур, Джэджэ районымкIэ зы мандат зиIэ хэдзыпIэ коеу N 2-мкIэ Ирина Викленкэр, Джэджэ районымкIэ зы мандат зиIэ хэдзыпIэ коеу N 3-мкIэ Николай Калиткиныр, Мые­къуапэкIэ зы мандат зиIэ хэдзыпIэ коеу N 10-мкIэ Евгения Графовар кандидатэу къагъэлъэгъуагъэх.

Iофтхьабзэм нэмыкI Iофыгъохэми ащыхэплъагъэх, пшъэрылъ гъэнэфагъэхэр агъэуцугъэх.

ДЕЛЭКЪО Анет.