Лъэпкъ проектэу «Щынэгъончъэ ыкIи шэпхъэшIухэм адиштэрэ гъогухэр» зыфиIорэм игъэцэкIэн къыды­хэ­лъытагъэу республикэм икъэлэ шъхьаIэ иурамэу 8 Мартыр, урамэу Пионерскэм къыщыублагъэу Кур­ганнэм нэс, агъэцэкIэжьынэу рагъэжьагъ.

Мы псэуалъэм изэтегъэпсыхьан мэхьанэшхо иI, сыда пIомэ Мыекъуапэ игурыт еджапIэхэу N 7-м ыкIи N 13-м ар апэIулъ.

Гъогум телъ асфальтыр зэрэзэ­блахъущтым дакIоу, мы чIыпIэм нэмыкI IофшIэнхэри щагъэцэкIэнхэу зэзэгъыныгъэм къыдыхэлъытагъ.

Мы урамыр Мыекъуапэ имагист­ральнэ урам шъхьаIэхэу Пионерскэм, Пролетарскэм, Крестьянскэм яуалIэ. СатыушIыпIэ комплексэу «Пирамида» зыфиIорэр урамхэу Пролетарскэмрэ 8 Мартымрэ язэхэкIыпIэ дэжь щыт. Джащ фэдэу мыщ социальнэ псэо­лъабэ щашIыгъ, арышъ, зэзэгъыныгъэм къыдыхэлъытагъэу машинэхэр зыдагъэуцущтхэ чIыпIэхэм зэрэха­гъэхъощтым мэхьанэшхо иIэ мэхъу.

Фирмэу «БАК-строй» зыфиIорэм бэдзэогъум ыгузэгу къыщегъэжьагъэу гъогум изегъэушъомбгъун фытегъэпсыхьэгъэ IофшIэнхэр регъэ­кIокIых. Гухэлъэу яIэмкIэ шышъхьэIум, лъэсрыкIо зэпырыкIыпIэхэм якIолIэрэ гъогухэр зэтырагъэпсы­хьащтых, асфальт атыралъхьащт, нэмыкI Iоф­шIэнхэр зэхащэщтых. ИлъэсыкIэ еджэгъум ехъулIэу проектым игъэцэкIэн аухынэу агъэнафэ.

Организацием псэолъэшI Iоф­шIэнхэр зэрэзэхищэхэрэм анаIэ тет МКУ-у «Благоустройство» зыфиIорэм испециалистхэм.

Непэрэ мафэм ехъулIэу гъогухэм язэтегъэпсыхьан, ягъэцэкIэжьын ыкIи ягъэкIэжьын епхыгъэ IофшIэнхэр республикэм ичIыпIэ зэфэшъхьафхэм ащэкIох. Лъэпкъ проектым къыды­хэлъытэгъэ пшъэрылъхэр анахь чанэу зэшIозыхрэ шъолъырхэм Адыгеир ащыщ.