Итхыгъэхэр пIуныгъэм къыфэджэх

Сыгу къыздеIэу, сигъатхъэу, гупшысэ, гушъхьэгъомылэ IэшIу хэсхэу седжагъ бэдзэогъум и 7-м тикIэсэ лъэпкъ гъэзетэу «Адыгэ макъэм» Мамырыкъо Нуриет итхыгъэу шIу тлъэгъоу, шъыпкъэныгъэр зиIэшэ усакIоу, тхакIоу, сурэтышIэу, зэкIэми яIэташъхьэ зыIулIэжьырэ цIыф къызэрыкIоу, адыгагъэм рыгъо­зэрэ Хъурмэ Хъусен фэгъэхьыгъэм.

СыгушIуагъ ыкIи тIэкIуи сыгу цIыкIу къышIыгъ: зэмкIэ – Хъу­сен илъэс 75-рэ хъугъэ, мэшэлахь! АдрэмкIэ – Хъусен илъэс 75-рэ хъугъэуи?

Сижъышъхьэм теубытагъэ хэлъэу къэсIон слъэкIыщт – 1966-рэ илъэсым ибжыхьэ къыщегъэжьагъэу Хъусенрэ сэрырэ тызэрэшIэшъ, джащ фэдизым тизэфыщытыкIэмэ шIоий, сэпаци къадэхьагъэп, ренэу тынэгу зэфихыгъ. Тхылъ пчъагъэу къыдигъэкIыгъэм тетхэгъэ Iушыгъэхэр яIэхэу къыситыгъэхэу симэкIае къагъэдахэ, къагъэбаи. Хъусен щыIэныгъэм къыфигъэуцурэ упчIэхэр сыдигъокIи зэфагъэм, шъыпкъэныгъэм тетэу зэшIуихынэу хьазырыгъ. Къин макIэп ылъэгъугъэри. Игухахъо­хэр, анахьэу игукъаохэр, бэп зэриIощтыгъэр. Сэ ахэм сызэрахэтыгъэм сегъэгушIожьы.

Бэмэ тарыгущыIэщтыгъ, Хъусен ынэгу ренэу зы гупшысэ горэ кIэлъ, ренэу зыгорэм егъэгумэкIы. Бэ зылъэгъугъэ, бэ зыщэчыгъэ цIыфэу зэрэщытыр къэошIэ. Институтым апэрэ сессием ыуж Хъусен тхащи, Дзэ Плъыжьым къулыкъу щихьынэу ащэгъагъ. Илъэсхэу къызытыгъэм итхэн зэпигъэугъэп, ау къы­харигъэутынэу тиредакцие зи къыгъэхьыгъагъэп. Ари зы Iоф горэмэ япхыгъагъ.

Иапэрэ тхылъ цIыкIу къыщегъэжьагъэу хигъахъозэ, тхэкIо-усэкIо хьалэмэт а илъэсхэм зэрэхъугъэр згъэунэфыгъэ. Адыгабзэр зэбгъэшIэщтмэ, акъыл хэпхыщтмэ, гушIуагъо хэбгъотэщтмэ, Хъусен итхылъхэр хьазырых!

Дунаишхом техъухьэрэм егъэгумэкIы, инэплъэгъу ригъэкIырэп. ЗэкIэмэ игупшысэ, иакъыл, икъэлэмыпэ анегъэсы. Ытхыгъэмэ зэкIэмэ сэ уасэ афэсшIынэу мурад зыфэзгъэуцужьырэп, ар шIэныгъэлэжьмэ афэсэгъазэ. Сэ къасIо сшIоигъор: итхылъхэр зэкIэ къызфаджэрэр пIуныгъэ-гъэсэныгъэ тэрэз адыгэ лъэпкъым иIэнэу ары. Ежь идунэететыкIэкIи, идунэееплъыкIэкIи ар къегъэшъыпкъэжьы. Арышъ, тIэкIу блэкIыгъэми, сыфэгушIо сшIоигъу илъэс 75-рэ зэрэхъугъэмкIэ.

Синыбджэгъоу Хъусен! Илъэс 75-р – шъэп – Шъэм нахьыби огъашI! Ощ фэдэх мы дунаир зыфыщыIэр. СыпфэлъаIо, псауныгъэр чъыгэежъэу пытэнэу.

Къорэлъф-пхъорэлъфи, Iахьыли, благъи, лъэпкъ гъэзетэу уищыIэныгъэ зэптырэм иIофышIэхэр къыпфэрэзэ зэпытхэу, адыгэ литературэу шIу дэдэ плъэгъурэм, бэрэ ущигъэлэжьэнэу Тхьэшхом непэ сыпфелъэIу, Хъусен!

СтIашъу Майор.