Лъэпкъ проектэу «ПсэупIэр ыкIи къэлэ щыIа­кIэр» зыфиIорэм игъэцэкIэн къыдыхэлъытагъэу Мыекъуапэ ищагу 24-рэ мы илъэсым зэтыра­гъэпсыхьагъэх. Бюджет зэфэшъхьафхэм къа­хэ­хыгъэ сомэ миллион 80 фэдиз ахэм апэIуа­гъэхьагъ.

Мыекъопэ къэлэ админист­ра­цием псэупIэ-коммунальнэ хъыз­мэтымкIэ ыкIи зэтегъэпсы­хьа­нымкIэ и ГъэIорышIапIэ къызэ­рэщаIуагъэмкIэ, специалистхэр ыкIи фэтэрыбэу зэхэт унэхэм ащыпсэухэрэр зэгъусэхэу щагу­хэм ягъэцэкIэжьын фытегъэ­псы­хьэгъэ унэе дизайн-проектхэр къагъэхьазырыгъэх ыкIи агъэ­федагъэх.

ГъэцэкIэжьынхэм яшIуагъэкIэ щагухэр аужырэ шапхъэхэм ади­штэ хъугъэх: лъэсрыкIо гъогухэр агъэкIэжьыгъэх, машинэхэр зыдагъэуцущт чIыпIэхэм ахагъэ­хъуагъ, джэгупIэ ыкIи спорт пло­щадкэхэр, тIысыпIэхэр, хэкIыр зыратэкъощт пкъыгъохэр агъэуцугъэх.

IофшIэнхэр зэрагъэцакIэхэрэм лъыплъагъэх къэлэ адми­нистрацием испециалистхэр, депутатхэр ыкIи общественнэ организациехэм ялIыкIохэр.

Федеральнэ программэм къы­дыхэлъытагъэу 2017-рэ илъэсым къыщегъэжьагъэу 2020-рэ илъэсым нэс республикэм икъэлэ шъхьаIэ ищагуи 129-мэ ыкIи иобщественнэ чIыпIэ 13-мэ гъэцэкIэжьынхэр ащыкIуагъэх, ахэм ятеплъэ хэпшIыкIэу нахь дахэ хъугъэ. Къихьащт илъэсми мы IофшIэныр лъагъэкIотэщт.

Сурэтхэр Мыекъопэ къэлэ ­ад­­министрацием исайт къитхыгъэх.