1998-рэ илъэсым ишышъхьэIу мазэ и 1-м Югославием иавтономнэ хэкоу Косовэ зэо-зэпэуцужьэу къитэджагъэм ыпкъ къикIэу, тилъэпкъэ­гъухэр къыращыжьыхи, хэкужъым къащэжьыгъагъэх.

Ащ къыщыублагъэу, илъэс 20-м ехъугъэшъ, а мафэр Хэ­кужъым къэзыгъэзэжьыгъэхэм я Мафэу хагъэунэфыкIы.

Ащ ипэгъокIэу АР-м и Къэралыгъо Совет — Хасэм идепутатхэр тилъэпкъэгъухэу IэкIыбым къикIыжьхи къытхэхьа­жьыгъэхэм аIукIэнхэр хэбзэшIу хъугъэ. Парламентым ипресс­-къулыкъу тызэрэщигъэгъоза­гъэмкIэ, мыгъи мары Къэра­лыгъо Советым — Хасэм и Тхьаматэу Владимир Нарожнэр депутатхэу Цэй Эдуардрэ Роман Подлегаевымрэ игъусэхэу къуаджэу Мэфэхьаблэ щыIагъ.

Аужырэ илъэсым къыкIоцI сабый къызэрыхъухьагъэхэр арых депутатхэм къакIухьа­гъэ­хэр. Ащ тетэу ахэр Аппэщ­хэм, Тюмерхэм, Абазэхэм, Мэщфыжьхэм ыкIи Сибайхэм яунагъохэм ащыIагъэх. Хэкужъым къэзыгъэзэжьыгъэхэм я Ма­фэкIэ афэгушIуагъэх, шIухьафтынэу афагъэхьазырыгъэхэр аратыгъэх.

Адыгэхэм ячIыгужъ къызэ­рагъэзэжьыгъэр хъугъэ-шIэгъэ инэу зэрэщытыр Владимир Нарожнэм къыхигъэщыгъ.

— Хэкужъым къызагъэзэ­жьым ахэм республикэм ищы­IакIэ охътэ кIэкIым зыхагъэгъо­зэжьыгъ, экономикэм, культурэм, псауныгъэм икъэухъумэн, нэмыкI лъэныкъохэм хэхъоныгъэхэр ашIынхэм мымакIэу яIахь къыхалъхьэ, — къыIуагъ ащ.

Тилъэпкъэгъоу къэзыгъэзэ­жьыгъэхэм ялIыкIохэми респуб­ликэм ипащэхэм ащ фэдэу анаIэ къызэратетым пае лъэшэу къы­зэрафэразэхэр къаIуагъ, Хэ­кужъым къэзгъэзэжьыгъэхэм я Мафэ адыгэ лъэпкъым изы­кIыныгъэ, мамыр щыIакIэм ыкIи зэгурыIоныгъэм ятамыгъэу хъу­нэу къэлъэIуагъэх. Къызэры­хъухьагъэхэу, илъэсыбэрэ зыщыпсэугъэхэ чIыпIэхэр къызабгынэхэм, къыздэкIожьыхэрэм мамырэу зэращыпэгъокIыщтхэм, зэряжэхэрэм, зэрадеIэщтхэм яцыхьэ телъэу къызэрагъэзэжьыгъэр кIагъэтхъыгъ.

ХЪУТ Нэфсэт.