УФ-м и Президентэу Владимир Путиным УФ-м и Федеральнэ ЗэIукIэ фэгъэзэгъэ Джэпсалъэу мэлылъфэгъу мазэм къышIыгъэм гъэстыныпхъэ шхъуантIэр ыпкIэ хэмылъэу унэе псэупIэхэм аращэлIэн амал цIыфхэм ятыгъэнэу унашъо къыщишIыгъагъ.

Къэралыгъом ипащэ ипшъэ­рылъ гъэцэкIэгъэным фэшI УФ-м и Къэралыгъо Думэ газификацием фэгъэхьыгъэ федеральнэ хэбзэгъэуцугъэм зэхъокIыныгъэ­хэр фишIыгъэх. Ащ къызэрэщыдэлъытагъэмкIэ, псэупIэр гъэстыныпхъэ шхъуантIэм ирыкIуа­пIэу ар зэпызычырэм къыхэщыгъэу унэе щагум игъу­напкъэ нэс кIорэ газрыкIуапIэм игъэ­псын ыпкIэ къэралыгъом ытыщт, ащ икIэу унэм екIуалIэрэр ежь бысымым иIоф.

Мы уахътэм шэпхъэ гъэнэфагъэу программэм къыщыдэлъытэгъэщтхэм Iоф адашIэ, ау ащ пае къэмынэу лъэIу тхылъхэр цIыфхэм аIахынхэу рагъэ­жьагъ. 2022-рэ илъэсыр ары программэр теубытагъэу зежьэщтыр.

УФ-м энергетикэмкIэ и Министерствэ къызэритырэмкIэ, ащ ишIуа­гъэкIэ унэ миллиони 2-м ехъумэ гъэстыныпхъэ шхъуантIэр ящэлIагъэ хъущт. Урысыер зэрэщытэу пштэмэ, процент 71,4-р ары газыр зыIэкIахьэрэр. 2026-рэ илъэсым нэс а пчъагъэр 74,7-м нагъэсынэу, 2030-м процент 82,9-мэ гъэстыныпхъэр аIэкIахьэ хъунэу ары гухэлъэу яIэр.

Урысые политическэ партиеу «Единая Россия» зыфиIорэм ифракциеу УФ-м и Къэралыгъо Думэ хэтым ипащэу Сергей Неверовым иеплъыкIэ къыриIотыкIызэ, цIыфхэм ипотекэр агъэпсэу, унэр зашIыкIэ, ащ гъэстыныпхъэ шхъуантIэр ращэ­лIэным, щызэбгыращыным пае етIани банкым чIыфэ къыIахэу бэрэ къызэрэхэкIырэр, программэр IэпыIэгъушхо зэрэхъущтыр къыхигъэщыгъ.

Гъэстыныпхъэ шхъуантIэр ыпкIэ хэмылъэу унэе псэупIэхэм ящэлIэгъэнэу Президентым пшъэ­рылъ къызишIыгъэр мэлылъфэгъум и 21-р ары, социальнэ программэр нахь кIасэу ежьэ. Джы «Единэ Россиер» мэлылъфэгъум и 21-м къыщегъэжьа­гъэу программэм кIуачIэ иIэ зыщы­хъурэм нэс газыр зиунэ езыщалIэхэрэм ахъщэу ащ пэIуагъэ­хьагъэм афегъэгъэ­зэжьыгъэным кIэщакIо фэхъугъ. Партием и Генсовет исекретарэу Андрей Турчак УФ-м и Правительствэ и Тхьаматэ игуадзэу Александр Новак зыIокIэм а предложениер къы­хьыгъ. Правительствэм ар игъоу ылъытагъ.

Урысыер зэрэщытэу пштэмэ, Темыр Кавказыр, Къыблэ ыкIи Приволжскэ федеральнэ шъо­лъырхэр ары анахьыбэу гъэстыныпхъэ шхъуантIэр зыщызэбгырыщыгъэр. Субъект пэпчъ игугъу пшIымэ, анахьыбэу цIыфхэм газыр зыщаIэкIахьэ­хэрэм ащыщ Адыгеир. Респуб­ликэм исым ипроцент 88,4-мэ мы гъэстыныпхъэр агъэфедэ.

АР-м и ЛIышъхьэ Къэралыгъо Советым – Хасэм фэгъэзэгъэ Джэпсалъэу къышIыгъэм къызэрэщиIуагъэмкIэ, республикэм игазификацие фэгъэхьыгъэу илъэситфым телъытэгъэ программэм «Газпромым» ипащэу Алексей Миллер блэкIыгъэ илъэсым дыкIэтхагъэх. Ащ сомэ миллиарди 3 инвестициеу къы­хэлъхьэгъэнэу ыкIи Iофтхьэбзэ 24-рэ зэшIуахынэу къыдыхэлъы­тагъэх. Ахэм яшIуагъэкIэ гъэстыныпхъэ шхъуантIэр зыIэ­кIахьэу Адыгеим исыр процент 96-м нэсыщт.

ХЪУТ Нэфсэт.