Урысые Федерацием культурэмкIэ и Министерствэрэ Къэбэр­тэе-Бэлъкъар Республикэм и Лъэпкъ музейрэ кIэщакIо зыфэхъу­гъэхэ къэгъэлъэгъонэу «Темыр Кавказым исурэтышIхэр» зыфиIо­рэр шышъхьэIум и 3-м щегъэжьагъэу и 20-м нэс Налщык щыкIощт.

КъокIыпIэм щыпсэухэрэ лъэпкъхэм яискусствэ и Кэралыгъо музей икъутамэу Мыекъуапэ дэтым щаугъоигъэхэ IофшIагъэхэр мыщ къыщагъэлъэгъощтых.

Адыгэ Республикэр къагъэлъэгъощт шъо­лъырым исурэтышI IэпэIасэхэу Къат Теуцожь, ПэтIыощэ Феликс, Тыгъужъ Махьмудэ, ДыдыкI Нурбый, Александр Резюкиным, Александр Егоровым, Юрий Кириченкэм, Къуанэ Аслъан, Александр Манакьян, Тигран Манакьян, Эдуард Овчаренкэм, ЛэупэкIэ Нурбый. Советскэ лъэхъаным профессиональнэ адыгэ искусствэм хэхъоныгъэ ышIыным мыхэм яIахьышхо хэлъ.

Темыр Кавказым лъэпкъхэу исхэм яискусствэ ибаиныгъэ къэгъэлъэгъогъэныр, цIыфхэр ащ нэIуасэ фэшIыгъэнхэр ары пшъэрылъ шъхьаIэу зэхэщакIохэм яIэр.