Зэфэхьысыжьхэр ышIыгъэх
Шъолъыр гъэIорышIэнымкIэ Гупчэу Адыгеим щыIэм республикэм щыпсэухэрэм къэбархэр аIэкIэгъэхьэгъэным епхыгъэ IофшIэныр бэдзэогъум лъигъэкIотагъ.
Мы мазэм кIуачIэ зиIэ хъугъэ хэбзэгъэуцугъэхэм афэгъэхьыгъэ материалхэр Гупчэм испециалистхэм къыхаутыгъэх, кIэлэцIыкIу гъэмэфэ лагерым кIохэрэм ащэфыгъэ путевкэм ыуасэ изы Iахь къызэкIагъэкIожьынымкIэ амалэу щыIэхэр къафаIотагъэх. Джащ фэдэу шъолъырым вакцинациер зэрэщыкIорэм, прививкэ зызщябгъэшIын плъэкIыщт чIыпIэхэр зыдэщыIэхэм къатегущыIагъэх.
Бэдзэогъум шъолъыр гъэIорышIэнымкIэ Гупчэм нэбгырэ 3554-мэ зыкъыфагъэзагъ. Ахэм ащыщэу 1442-мэ мы уахътэм Iоф адашIэ, адрэ 2112-р зэхафыгъэх. Ыпэрэ мазэм фэдэу цIыфхэр анахьэу зыгъэгумэкIыхэрэр псэупIэ-коммунальнэ хъызмэтым, псэуалъэхэм язэтегъэпсыхьан, гъогухэм ыкIи вакцинацием япхыгъэ Iофыгъохэр ары.
Анахь мэхьанэшхо зиIагъэхэм ащыщ Урысыем и ЛIыхъужъэу Владислав Долониным исаугъэт ихэку цIыкIу къызэращэжьыгъэр. АщкIэ яшIуагъэ къагъэкIуагъ шъолъыр гъэIорышIэнымкIэ Гупчэм, АР-м и ЛIышъхьэрэ иминистрэхэм я Кабинетрэ я Администрацие, Мыекъуапэ имэрие. Владислав Долониным исаугъэт 2016-рэ илъэсым щагъэуцугъагъ къулыкъу зыщихьыгъэ Свердловскэ хэкум. Ау дзэ частыр зэрагъэкощыгъэм къыхэкIыкIэ ар нэмыкI чIыпIэ ащэн фаеу хъугъэ.
Шъолъыр гъэIорышIэнымкIэ Гупчэу Адыгеим щыIэм ипащэу Къоджэшъэо Аскэр Мыекъопэ къэлэ администрацием ыкIи лIыхъужъым иблагъэхэм аIукIагъ. Ащ ыуж унашъо ашIыгъ Владислав зыщеджэгъэ Мыекъопэ гурыт еджапIэу N 3-м саугъэтыр щагъэуцужьынэу. Ащ QR-код хэтыщт, ар сканировать зыпшIыкIэ, Адыгеим икIэлэ пIугъэ лIыхъужъныгъэу зэрихьагъэм икъэбар зэбгъэшIэн плъэкIыщт.
[caption id="attachment_96490" align="aligncenter" width="800"] Адыгэкъалэ иурамэу Советскэр зэтырагъэпсыхьагъ.[/caption]
Гупчэмрэ республикэм иведомствэхэмрэ зэпхыныгъэ яIэу Iоф зэдашIэ. БэмышIэу АР-м хэгъэгу кIоцI IофхэмкIэ иминистрэу Иван Бахиловымрэ Къоджэшъэо Казбекрэ IофшIэгъу зэIукIэгъоу зэдыряIагъэм тапэкIэ лъэныкъохэм Iоф зэрэзэдашIэщтым щытегущыIагъэх, ащкIэ зэзэгъыныгъэ зэдашIыгъ. Iофтхьабзэм хэлэжьагъ республикэм ипэщагъэу, АР-м и МВД щызэхащэгъэ Общественнэ советым итхьаматэу, социологие шIэныгъэхэмкIэ докторэу, профессорэу ТхьакIущынэ Аслъан.
Джащ фэдэу Мыекъуапэ Iоф щызышIэрэ гъэIорышIэкIо компаниехэм, псэупIэ инспекцием ыкIи общественнэ организациехэм зэпхыныгъэ адыряIэу зэдэлэжьэнхэу зэдаштагъ. Социальнэ хъытыур ыкIи платформэу «Госуслуги. Решаем вместе» зыфиIорэр къызфагъэфедэзэ закъыфэзгъэзэрэ цIыфхэм ягумэкIыгъохэр зэхэфыгъэнхэмкIэ ащ фэдэ екIолIакIэм мэхьанэшхо иI. Ежь гъэIорышIэкIо компаниехэри мыщ къыхэлэжьэнхэм фэхьазырых. Адыгеим щыпсэухэрэм яIофыгъохэр псынкIэу зэхэфыгъэнхэм Гупчэм ынаIэ тет. ГущыIэм пае, Еленовскэ къоджэ псэупIэм иадминистрацие шIыкIакIэм тетэу иIофшIэн зэхищэн амал иIэ хъугъэ. Ащ дэс цIыфхэм зэпхыныгъэ адыряIэным ыкIи яIофыгъохэр зэхэфыгъэнхэм афэшI социальнэ хъытыум иамалхэр администрацием къызфигъэфедэнхэу ригъэжьагъ. ПсэупIэм дэсхэр анахьэу зыгъэгумэкIхэу къагъэнэфагъэр кIэлэцIыкIу джэгупIэр къэшIыхьэгъэныр ыкIи а чIыпIэр агъэкъэбзэныр ары. ЦIыфыбэ зыхэлэжьэгъэ шэмбэт шIыхьафым ишIуагъэкIэ а Iофыгъор зэхэфыгъэ хъугъэ.
Адыгэкъалэ щыпсэурэ бзылъфыгъэми Гупчэм зыкъыфигъэзагъ. Урамэу Советскэм тротуарыкIэхэр щагъэпсыхэ зэхъум, автомобильхэм къызщагъэзэн алъэкIыщт чIыпIэхэр къагъэнэгъагъэх. Ащ къыхэкIыкIэ лъэсрыкIохэр гумэкIыгъо хэфагъэх. Адыгэкъалэ иадминистрацие къыхэлажьэзэ мы щыкIагъэр дэгъэзыжьыгъэ хъугъэ, лъэсрыкIо гъогум къыдэфэрэ чIыпIэхэм асфальт атыралъхьагъ.