АР-м хэгъэгу кIоцI IофхэмкIэ и Министерствэ кощын IофхэмкIэ и подразделение 2021-рэ илъэсым имэзихэу пыкIыгъэм Iофэу ышIагъэр зэфихьысыжьыгъ.

Iофтхьабзэм хэлэжьагъэх ведомствэм иминистрэу Иван Бахиловыр, кощын IофхэмкIэ къулыкъум ипащэу Андрей Скобченкэр, ащ игуадзэхэр, гъэIоры­шIапIэм иIофышIэхэр, кощын IофхэмкIэ районхэм ащыIэ чIыпIэ подразде­лениехэм яIофышIэхэр.

Доклад къышIызэ, Скобченкэм къызэриIуагъэмкIэ, зытегущыIэхэрэ уахътэм къыхиубытэу яIофшIэнкIэ анахьэу анаIэ зытырагъэтыгъэр цIыфхэм къэралыгъо фэIо-фашIэхэр икъоу афэгъэцэкIэгъэнхэр ыкIи ар Iэрыфэгъу афэшIыгъэныр ары.

— Статистикэм укъыпкъырыкIымэ, мы илъэсым имэзихэу пыкIыгъэм рес­публикэм щыпсэухэрэм ыкIи хьакIэхэм гъогогъу мин 70-м ехъоу фэIо-фа­шIэхэр афагъэцэкIагъэх. Ахэм ащыщэу мин 66-р физическэ лицэх, — къыIуагъ А. Скобченкэм.

Зэфэхьысыжьхэм къызэрагъэлъагъо­рэмкIэ, анахьыбэу агъэцэкIэрэ фэIо-фашIэхэр Урысыем ицIыфхэр регист­рацие шIыгъэнхэр, IэкIыб къэралыгъо къикIыгъэхэр кощын IофхэмкIэ учетым хэгъэуцогъэнхэр, джащ фэдэу паспортхэм язэблэхъун.

Ахэм анэмыкIэу гъэIорышIапIэм икъу­лыкъушIэхэм республикэ МВД-м иподразделениехэр ыкIи Адыгеим ихэбзэу­хъумэкIо къулыкъухэр ягъусэхэу кощын Iофхэм алъэныкъокIэ хабзэр зыукъо­хэрэм якъыхэгъэщын епхыгъэ Iофтхьэ­бзэ зэхэубытагъэхэр зэхащэх.

— Къэралыгъо фэIо-фашIэхэм ягъэцэкIэн епхыгъэ Iофыгъохэр пшъэрылъ шъхьаIэу гъэIорышIапIэм ыпашъхьэ ит­хэм ащыщ. Мы Iофыгъом зэпыу имыIэу кощын IофхэмкIэ къулыкъум зыкъы­фэзгъэзагъэхэм яфэIо-фашIэхэр игъом афагъэцэкIэнхэ фае, — къыIуагъ министрэу И. Бахиловым.

КIэухым министрэм гъэIорышIапIэм ипащэхэм анаIэ тыраригъэдзагъ яIофышIэхэм дисциплинэр ыкIи хабзэр амыукъоным лъыплъэгъэнхэу. Ащ нэмыкIэу тапэкIэ Iоф зыдашIэнэу щыт пшъэрылъ шъхьаIэхэр къыгъэуцугъэх.