Уголовнэ Iоф 11 къызэIуахыгъ
ЯтIуанэрэу ешъуагъэу къаубытыгъэ водитель 11-мэ алъэныкъокIэ бэдзэогъу мазэм Адыгеим иполицие уголовнэ Iофхэр къызэIуихыгъэх.
Теуцожь районым игъогу-патруль къулыкъу иIофышIэхэм къулыкъур ахьызэ автомобилэу «Ладэм» икIуакIэ ашIотэрэзыгъэп. Полицием иIофышIэхэм машинэр къызагъэуцум, Адыгэкъалэ щыщэу илъэс 28-рэ зыныбжь водителыр ешъуагъэу рулым Iусэу къычIэкIыгъ. Медицинэ уплъэкIунэу арагъэшIыгъэми ар къыушыхьатыжьыгъ.
Нэужым къызэрэнэфагъэмкIэ, ыпэкIи ешъуагъэу къагъэуцуи, административнэ пшъэдэкIыжь рагъэхьыгъ.
Мыщ ыпэкIэ Теуцожь районым щыщэу илъэс 27-рэ зыныбжьым ылъэныкъокIэ уголовнэ Iоф къызэIуахыгъ. Чэщыр хэкIотагъэу автомобилэу ВАЗ-р къулыкъушIэхэм къызагъэуцум водителым изекIокIэ-шIыкIэхэр ашIотэрэзыгъэп. КъызэрэчIэкIыгъэмкIэ, водителыр ешъуагъэу рулым Iусыгъ. Мыщ ыпэкIи ешъуагъэу къагъэуцуи, административнэ тазыр ыкIи уголовнэ Iоф тыралъхьэгъагъ.
АР-м хэгъэгу кIоцI IофхэмкIэ и Министерствэ шъугу къегъэкIыжьы, Урысыем и Уголовнэ кодекс истатьяу 264-м иа 1-рэ Iахь къызэригъэнафэрэмкIэ, ятIуанэрэу ешъуагъэу къагъэуцухэрэм илъэси 2-м нэс хьапс атыралъхьащт. Мы илъэсым бэдзэогъум аштэгъэ унэшъуакIэм къызэрэщиIорэмкIэ, илъэси 3-м нэс хьапс арагъэхьын алъэкIыщт.