Мэфищым къыкIоцI республикэм игъогухэм хъугъэ-шIэгъи 7 къатехъухьагъ, нэбгыри 9-м шъобжхэр атещагъэхэ хъугъэ.

Бэдзэогъум и 19-м Мыекъуапэ гъогу хъугъэ-шIагъэу къыщыхъугъэм къыхэкIыкIэ лъэсрыкIом шъобжхэр тещагъэхэ хъугъэ. ЗэрагъэунэфыгъэмкIэ, къалэм щыпсэурэ хъулъфыгъэу илъэс 73-рэ зыныбжьым автомобилэу ВАЗ-р ыгъэIорышIэзэ гъогу зэпыры­кIы­пIэм дэжь къызщигъэзэщтым сакъы­ныгъэ къызхимыгъафэу илъэс 74-рэ зыныбжь лъэсрыкIор риутыгъ. Бзылъфыгъэм шъобжхэр тещагъэхэу сымэджэщым ащагъ.

Бэдзэогъум и 18-м Мыекъуапэ иура­мэу Краснооктябрьскэм илъэс 24-рэ зыныбжь кIалэр иавтомобиль исэу къы­зэкIакIозэ кушъхьэфачъэм тесыгъэ Iэта­хъоу илъэс 16 зыныбжьыр риутыгъ. Мы хъугъэ-шIагъэм къыхэкIыкIэ шъэожъыем шъобжхэр тещагъэхэу сымэджэщым нагъэсыгъ.

Мы мэфэ дэдэм, сыхьат заулэкIэ нахь пасэу, Кощхьэблэ районым иавтомобиль гъогу Iахьэу «Мыекъуапэ — Джаджэ — Псыбай — Зеленчукская — Карачаевск» зыфиIорэм Краснодар краим щыщ хъулъфыгъэу илъэс 25-рэ зыныбжьыр игъогу дэчъэхи, зэпыригъэзагъ. Мы уахътэм водителыр сымэджэщым чIэлъ.

Бэдзэогъум и 17-м Мыекъопэ районым иавтомобиль гъогоу «Гъозэрыплъ — Яворова поляна» зыфиIорэм ия 10-рэ километрэ дэжь Краснодар краим щыпсэурэ хъулъфыгъэу илъэс 41-рэ зыныбжьыр IэкIыб къэралым къыща­шIыгъэ машинэм исэу игъогу дэчъэхи, чъыгым еутэкIыгъ. Нэужым автомобилым машIо къыкIани стыгъэ. Мы хъугъэ­шIагъэм зыпари хэкIодагъэп.

Мы уахътэм ехъулIэу мы хъугъэ-шIагъэхэмкIэ уплъэкIунхэр макIох, ащ ыуж зэфэхьысыжьхэр ашIыщтых. Къэралыгъо автоинспекцием икъулыкъушIэхэр во­дительхэм ыкIи лъэсрыкIохэм къяджэх гъогум сакъыныгъэ къыщызхагъэфэнэу, псынкIащэу земычъэнхэу, анахьэу пчы­хьэ хэкIотагъэм.