Къэралыгъо автоинспекциер зызэхащагъэр илъэс 85-рэ зэрэхъурэм фэгъэхьыгъэу мыгъэ сурэттехынымкIэ зэнэ­къокъу зэхащагъ.

Iофтхьабзэм хэлэжьагъэх автоин­спекцием иIофышIэхэр, сурэттеххэр, сурэттехыныр зикIасэхэр, джащ фэдэу гъэсэныгъэ зыщызэрагъэгъотырэ организациехэм ащеджэхэрэр.

Iофтхьабзэм хэлажьэхэрэр едзыгъуи 5-кIэ зэнэкъокъугъэх.

— «Къэралыгъо автоинспекциер: блэкIыгъэр, мы уахътэр ыкIи къэкIощт уахътэр»;

— «Тигъогухэр»;

— «Къэралыгъо автоинспекцием иIофышIэхэр» ;

— «КIэлэцIыкIухэм ящыIэныгъэ ­къэшъуухъум»;

— «ГъогурыкIоныр щынэгъончъэу щытыныр — сэмэркъэу шъуашэ иIэу».

Зэнэкъокъур едзыгъуитIоу кIуагъэ шъо­лъыр ыкIи федеральнэ мэхьанэ яIэу. Федеральнэ зэнэкъокъум тикъэралыгъо ишъолъыр 85-мэ ащыпсэухэрэм яIофшIэгъэ 500 фэдиз къырахьылIагъ. Анахьыбэу IофшIэн зыдагъэхьыгъэ едзы­гъор «КIэлэцIыкIухэм ящыIэныгъэ къэшъуухъум» зыфиIорэр ары. ЗэкIэмкIи ащ IофшIэгъэ 2076-рэ къырахьылIагъ. Мы лъэныкъомкIэ ятIонэрэ чIыпIэр ­къыдихыгъ гъэсэныгъэ тедзэ зыщызэрагъэгъотырэ гупчэу Мыекъуапэ дэтым икIэлэегъаджэу Елена Зезюкинам. Шъугу къэдгъэкIыжьын, ар ныбжьыкIэ инспекторхэм якомандэ ипащ, респуб­ликэ зэнэкъокъоу «Безопасное колесо-2019» зыфиIорэм текIоныгъэ къыщыдихыгъ ыкIи Урысые зэнэкъокъум Адыгеир къыщигъэлъэгъуагъ. Къалэу Казань щыкIогъэ Iофтхьабзэм я 3-рэ чIыпIэр къыщыфагъэшъошагъ.

Ащ нэмыкIэу, Елена Зезюкинам АР-м Къэралыгъо Совет — Хасэм рэзэныгъэ тхылъ къыфигъэшъошагъ.

Къэзыгъэхьазырыгъэр КIАРЭ Фатим.