- Уз щынагъоу коронавирусым пэшIуекIогъэнымкIэ вакцинэр хэти зыхаригъалъхьэмэ ишIуагъэ къэкIонэу сэгугъэ, - къытиIуагъ гуманитар ушэтынхэмкIэ Адыгэ республикэ институтэу Т. КIэращэм ыцIэ зыхьырэм ипащэ игуадзэу, филологие шIэныгъэхэмкIэ докторэу Биданэкъо Марзият.

Щыгъуазэ тызэрэхъугъэмкIэ, институтым зэкIэмкIи нэбгырэ 62-мэ Iоф щашIэ. Ахэм нэбгырэ 20-м вакцинэр зыхарагъэлъхьагъ, нэбгыритIум япсауныгъэ изытеткIэ зыхалъхьан алъэкIыщтэп. Нэбгырэ 26-м антителахэр икъоу яIэх. Зыхязыгъэлъхьан фаеу джы коллективымкIэ яIэр нэбгырэ 14-р ары. «Ахэм нахь игъэкIотыгъэу зарагъэуплъэкIунышъ, къякIунэу къызэраIокIэ зыхарагъэлъхьащт», - къытиIуагъ Марзият.

- Сэ сшъхьэкIэ икIыгъэ илъэсым итыгъэгъэзэ мазэ и 6-м къыщегъэжьагъэу мэфэ 21-м сысымэджагъ, - еIо ащ, - узыр къинэу, щэIэгъуаеу зэрэщытыр сэри сауж мэфитIукIэ къинагъэу къэсымэджэгъэгъэ сишъхьэгъуси тшIагъэ. Къызыбнэсыщти, узэришIыщти къэпшIэщтэп.

Коронавирусыр уз бзадж: тхьамэфитIум сымакъэ къикIэу сыкъэгущыIэшъугъэп, ерагъэу IапэкIэ язгъэлъэгъузэ, сызыфаер агурызгъаIощтыгъ. Температурэр 38-м нэсыгъагъ, тIо анализхэр зысагъэтхэм, тIумкIи узыр сиIэу къыгъэлъэгъуагъ. Стхьабылхэм процент 15-у къахэхьэгъагъ, зэкIэ пкъынэ-лынэхэр Iаеу узыщтыгъэх, непэ къызнэсыгъэм зыгорэущтэу сиIыгъ, ауми, нахь зыкъэсшIэжьыгъ…  - еIо  мэзитIум ыуж ерагъэу зыкъэзышIэжьыгъэ бзылъфыгъэм.

- Адэ джы вакцинэр зыхэплъхьанэу зыогъэхьазыра?

- Сэ аллергие Iае къэкIырэ лъэпкъхэмкIэ сиI, арышъ, дэгъоу зызязгъэуплъэкIухэ уж, хъунэу къычIэкIымэ, зыхэслъхьащт. Вакцинэр зэкIэми зыхамылъхьэмэ хъущтэп, узым зидзын, цIыф бэдэдэ зэлъикIун ылъэкIыщтэп. Типшъэрылъи тыфай дгъэцэкIэнэу, ау хэти ежь-ежьырэу, психологическэу, ыгукIэ вакцинацием зыфигъэхьазырыныр нахь сшIотэрэз. Уз щынагъохэр зэкIэлъыкIохэу къызыкIохэкIэ, хабзэ вакцинэу ащкIэ къашъхьапэщтыр зыхарагъалъхьэу. ТапэкIи цIыфхэм  бэ апэкIэкIыгъэр: емынэр, тэлаур,шъорэкIыр – уапэшIуекIонымкIэ вакцинэр арыгъэ  апэрагъэр. Джащыгъуми щтэщтыгъэх, фэягъэхэп.

Медицинэм къыIорэр ары тшIэн фаер, тэ тизакъоп, зэрэдунаеу пандемием егъэтIыгурыгу, лIэныгъэр афызэтеIажэрэп, узым къытырегъэзэжьы, «ыгу» загъэрэп, арышъ, Iэзэгъу хъущт вакцинэр теубытагъэ хэлъэу зыхэлъхьэгъэн фае.Джащыгъум, коронавирусри тпыкIыжьыщт.

Мамырыкъо Нуриет.