Мы аужырэ илъэсхэм гуфэкIо движением Урысыем хэпшIыкIэу зыщиушъомбгъугъ, ащ къыдыхэлъытагъэу волонтер штаб зыкI къэралыгъом щызэхащагъ.

Мыщ хэхьэрэ ныбжьыкIэхэм яIофшIэн зэрифэшъуашэу зэхащэн амал яIэным, ахэм IэпыIэгъу афэхъугъэным фытегъэ­псыхьэгъэ унашъохэр къэралыгъом щаштагъэх. Волонтер дви­жением хэхъоныгъэ ышIыным анаIэ тет УФ-м и Президентэу Владимир Путиным, партиеу «Единэ Россием». ГуфакIохэм непэ щыIэныгъэм чIыпIэшхо зэрэщаубытырэр, ахэм яIофшIэн мэхьанэшхо зэриIэр къыгъэлъэгъуагъ пандемиер къызежьэм. Медицинэм иIофышIэхэм ягъусэхэу ныбжьыкIэхэм IофшIэнышхо агъэцэ­кIагъ. ЦIыфхэм IэпыIэгъу афэхъугъэх, шIушIэ Iофтхьабзэхэр зэха­щагъэх, непи ар лъагъэкIуатэ.

Джащ фэдэу общественник­хэр, анахьэу ныбжьыкIэхэр, хэдзынхэм ахэлэжьэнхэ зэрэфаем Урысыем и Президент дырегъаштэ. Урысые Iофтхьабзэу «МыВместе» зыфиIорэм чанэу хэлэжьагъэхэм заIокIэм ащ фэгъэхьыгъэу къыIогъагъ. Владимир Путиным зэрилъы­тэрэмкIэ, хэгъэгум хэхъоныгъэ ышIынымкIэ ащ ишIуагъэ къэ­кIощт. Сыда пIомэ гуфэкIо дви­жением хэтхэм Iофыгъо зэфэшъхьафхэм язэшIохынкIэ еплъы­кIэ шъхьафхэр яIэх, ахэр чаных, къэралыгъом ишIуагъэ рагъэкIыным фэхьазырых.

«Единэ Россием» и Генеральнэ совет и Секретарэу Андрей Турчак зэрэхигъэунэфыкIыгъэмкIэ, хэдзынхэм зафэгъэхьазырыгъэнымкIэ партиер общественникхэм IэпыIэгъу афэхъущт.

Джащ фэдэу ныбжьыкIэ гвардием иактивистхэмрэ партиеу «Единэ Россием» иволонтер­хэмрэ зэгъусэхэу шIушIэ Iоф­тхьабзэхэр зэхащэх. Ахэм зэу ащыщ коронавирусым ыпкъ къи­кIыкIэ унэм исын фаеу хъу­гъэ тинахьыжъхэм агу рихьырэ тхылъхэр аIэкIэгъэхьэгъэнхэр.

Тхылъыр къыпфахьыным пае «Единэ Россием» и Волонтер гупчэ лъэIукIэ зыфэбгъэзэн фае. Ащ ыуж мэфэ заулэ тешIагъэу зыныбжь хэкIотагъэм зыфэе ли­тературэр ныбжьыкIэ гвардейцэхэм къыфахьыщт.

Волонтерхэр къэралыгъом зэрищыкIагъэхэр уахътэм къы­гъэ­лъэгъуагъ. ЩыIэныгъэм чIы­пIэ къин ригъэуцуагъэхэм, IэпыIэгъу зищыкIагъэхэм ныбжьыкIэхэр алъэIэсых, амалэу яIэмкIэ яшIуагъэ арагъэкIы.

Адыгэ Республикэм и ЛIышъхьэу КъумпIыл Мурат Iофышхо зышIэрэ гуфэкIо движением хэхъоныгъэ ышIыным, чанэу зипшъэрылъхэр зыгъэцэкIэрэ ныбжьыкIэхэр къыхэгъэщыгъэнхэм сыдигъуи ынаIэ тет. Сыд фэ­дэрэ лъэныкъокIи ахэм мэхьанэшхо зэряIэр ипсалъэ пчъа­гъэрэ къыщыхигъэщыгъ.

ТХЬАРКЪОХЪО Адам.