Урысыем икъулыкъухэу псауныгъэм икъэухъумэн фэгъэзагъэхэм пэублэ медицинэ IэпыIэгъумкIэ шэпхъакIэхэр ящыкIагъэх, ахэм лъапсэу афэхъун фаер сымаджэхэм апшъэрэ мэхьанэ ятыгъэныр ары.

Ащ пае кадрэхэм яухьазырыныгъэ зыкъегъэIэтыгъэн, зэпымыоу ахэм гъэсэныгъэ ягъэгъотыгъэн, шIокI зимыIэ медицинэ страхованием мылъку къызэрэфатIупщырэ шIыкIэм зэхъокIыныгъэхэр фэшIыгъэнхэ фае. Коммунаркэм исымэджэщ иврач шъхьаIэу Денис Проценкэм партиеу «Единэ Россием» истратегическэ сессие ащ фэгъэхьыгъэу къыщиIуагъ. Шъо­лъырхэм арыс медицинэ IофышIэхэм партием инароднэ программэ хагъахьэ ашIоигъо предложениехэм мыщ щатегущыIагъэх. Федеральнэ шэпхъа­кIэм диштэу апшъэрэ мэхьанэ зэратын фаер цIыфыр ары.

«Амбулаторнэ картэр, консилиумхэр арэп апэ рагъэшъын фаехэр, зэкIэми анахь шъхьаIэр сымаджэр ары. Ащ фэдэ шапхъэхэм афэгъэхьыгъэ къэбар­хэр медицинэ учреждение пстэуми аIэкIагъэхьанхэ фае», — къыIуагъ Денис Проценкэм.

Ащ зэрэхигъэунэфыкIыгъэмкIэ, шэпхъакIэхэм ятехьан джырэ информационнэ технологиехэр тыдэкIи щыгъэфедэ­гъэнхэм диштэн фае.

Сессием хэлэжьагъэхэр псауныгъэм икъэухъу­мэнкIэ Iофыгъо шъхьаIэхэм зэу ащыщым – анахьэу къуаджэхэм специалистхэр зэращафимыкъухэрэм тегущыIагъэх. Партиеу «Единэ Россием» инароднэ программэ исайт къихьэрэ предложениехэмкIэ анахь зигъо Iофыгъуищ­мэ мыр ахэхьэ. Къэралыгъо Думэм идепутатэу Александр Якубовскэм зэрилъытэрэмкIэ, программэу «Земский доктор» зыфиIорэр медицинэ IофышIэхэр къуаджэхэм ащылэжьэнхэм фытегъэпсы­хьагъ. Ащ игъо ылъэгъугъ партиеу «Единэ Россием» инароднэ программэ хэгъэхьэгъэнэу специалист ныбжьыкIэхэм Iоф зыщашIэщт псэупIэм емылъытыгъэу ахъщэу аратырэм адыхэгъэхъогъэнэу.

«Зеджахэхэ нэуж ыпэкIэ къуа­джэу зыдэсыгъэхэм къэзыгъэзэжьы зышIоигъо специалистхэм ащ фэдэ ахъщэ къаратырэп. ЗэрэхъурэмкIэ, специалист ныбжьыкIэр къуаджэм екIышъ, медицинэ университетым щеджэ, диплом къыраты, ау икъоджэ гупсэ ащ къыгъэзэжьын ылъэкIырэп. Iоф щи­шIэнэу ащ нэмыкI чIыпIэ къыхихын фаеу мэхъу», — къы­Iуагъ Александр Якубовскэм.

Фельдшер-мамыку IэзапIэхэм Iоф ащызышIэрэ специалист ныбжьыкIэхэм зыщыпсэущт унэ ягъэгъотыгъэным епхыгъэ Iофы­гъори зэшIохыгъэн фае. Александр Якубовскэм зэрилъытэ­рэмкIэ, фельдшер-мамыку IэзапIэхэм язэхэщэнкIэ шапхъэ­хэм зэхъокIыныгъэ горэхэр афэшIыгъэнхэ, ащ фэдэ IэзапIэхэм медицинэ IофышIэр зыщыпсэун ылъэкIыщт унэ хэтын фае.

Медицинэ IофышIэхэр зэрафимыкъухэрэр дэгъэзыжьыгъэным пае медицинэ сэнэхьат гъэнэфагъэхэмкIэ бюджет чIыпIэхэр нахьыбэ шIыгъэн фаеу Урысые Федерацием псауны­гъэр къэухъумэгъэнымкIэ и Министерствэ и Волгоградскэ къэралыгъо медицинэ университет иректорэу Владимир Шкариным елъытэ. Мыщ дэжьым гущыIэр зыфэгъэхьыгъэр эпидемиологхэр, реаниматологхэр, инфекционистхэр ары.

«Апэрэ курсым къыщегъэ­жьагъэу студентхэр медицинэ учреждениехэм япхыгъэнхэ фае. Я 3-рэ курсым зихьэхэкIэ студентхэм медсестрам къытефэрэ пшъэрылъхэр дэгъоу агъэцакIэх, я 6-рэ курсыр къэзыухыгъэхэм врач IэнатIэм Iутхэу Iоф ашIэн алъэкIыщт», — къыIуагъ ащ.