«Гу-лъынтфэ узхэм апэуцужьыгъэныр» зыфиIорэ шъолъыр проектым игъэцэкIэн сомэ миллион 96-м ехъу Адыгеим щыпэIуагъэхьанэу агъэ­нафэ.

Ащ щыщэу миллион 53-м ехъурэмкIэ медицинэ орга­низациехэр зэтырагъэпсыхьа-щтых, инсульт, инфаркт зиIа­гъэхэм, джащ фэдэу зыгу операцие ашIыгъэхэм ящыкIэгъэщт Iэзэгъу уцхэр ащэфыщтых мил­лион 42-м ехъурэмкIэ.

— 2022-рэ илъэсым проектэу «Гу-лъынтфэ узхэм апэуцу­жьыгъэныр» зыфиIорэм хахьэу лъынтфэ узхэм зыщяIэзэхэрэ гупчэхэу Адыгэ республикэ кли­ническэ сымэджэщым, Мые­къопэ къэлэ клиническэ сы­мэджэщым ыкIи К. М. Батмэным ыцIэ зыхьырэ Адыгэкъэлэ межрайон сымэджэщым ахэтхэр зэтырагъэпсыхьажьыщтых. Гу-лъынтфэ узхэм апэуцужьыгъэным 2022-рэ илъэсым зэкIэмкIи сомэ миллион 86,5-рэ пэIуагъэхьан гухэлъ щыI, — къеты АР-м псауныгъэр къэу­хъумэгъэнымкIэ и Минис­терствэ ипресс-къулыкъу.

«Шъолъыр проектыр респуб­ликэм щыпсэухэрэм игъом ыкIи зэрищыкIагъэм тетэу кардио­логическэ IэпыIэгъу тафэхъуным ыкIи операцие ужым ахэм япсауныгъэ икъоу зэтегъэуцо­жьыгъэным фэIорышIэщт», — еIо Адыгэ республикэ клини­ческэ сымэджэщым иврач шъхьаIэу Чэужъ Нателлэ.