Тишъыпкъэу зыфэдгъэхьазырын фае
Бэдзэогъум и 27-м АР-м и Общественнэ Совет зэхэсыгъо иIагъ. Хэдзынхэу мы илъэсым иIоныгъо мазэ кIощтхэм алъыплъэщт общественнэ штабымрэ политическэ партиехэм якъутамэхэмрэ Iоф зэрэзэдашIэщтым ащ щытегущыIагъэх.
Зэхэсыгъом хэлэжьагъэх АР-м и Общественнэ палатэ и Тхьаматэу Устэ Руслъан, ащ игуадзэхэу Барцо Тимур, Анна Крюковар, Общественнэ палатэм пшъэдэкIыжь зыхьырэ исекретарэу Щыкъэ Раситэ, Общественнэ палатэм хэтэу Бзэджэжъыкъо Абрек, партиеу «Единэ Россием» и ЧIыпIэ гъэцэкIэкIо комитет ипащэу АфэшIэгъо Рэмэзан, шъолъыр гъэIорышIэнымкIэ Гупчэм ипащэу Къоджэшъэо Казбек ыкIи нэмыкIхэр.
Зэхэсыгъор къызэIуихыгъ Общественнэ палатэм и Тхьаматэ ыкIи мы илъэсым щыIэщт хэдзынхэр адрэхэм лъэшэу зэратекIырэр, Iофтхьабзэм илъыплъакIохэм анаIэ зытырагъэтын фаехэр къыхигъэщыгъ.
Нэужым къэгущыIагъ Общественнэ палатэм пшъэдэкIыжь зыхьырэ исекретарэу Щыкъэ Раситэ. Ащ хэдзынхэм язэхэщэнкIэ опыт гъэнэфагъэ иI, блэкIыгъэ хэдзынхэми, УФ-м и Конституцие зэхъокIыныгъэхэр фашIыхи, ахэмкIэ цIыфхэм амакъэхэр атынхэ зэхъуми Iофтхьабзэм лъыплъэгъэнымкIэ Общественнэ штабым иIофхэм чанэу ахэлэжьагъ. Ащ ипсалъэ ыуж зэхэсыгъом хэлажьэхэрэм упчIэхэр къатыгъэх, яшIошIхэр къыраIотыкIыгъэх. ГущыIэм пае, цIыфэу иунэ исэу ымакъэ ытынэу ыIуи зязыгъэтхыгъэр хэдзыпIэ чIыпIэм къэкIонышъ, бырсыр ышIын ылъэкIыщт. Ащ фэдэ зыхъукIэ сыда лъыплъакIохэм ашIэн фаер?
Щынэгъончъэу хэдзынхэр зэхэщэгъэнхэм мэхьанэшхо иI. Видеолъыплъэнхэр хэдзыпIэ чIыпIэ пэпчъ ащызэхащэщтых. Ау сыда камерэм къыридзэн фаер, сыда къыридзэ мыхъущтыр? Хэдзынхэм алъыплъэщтхэм яегъэджэн иIоф зэрэкIорэм къыкIэупчIагъэхэти, зэхэсыгъом хэлажьэхэрэм яшIошIхэр зэтефагъэхэп. Зыхэм еджэнхэр зэхэпщэнхэр жьыIоу алъытагъ, адрэхэм еджапIэхэм яIофшIэн рамыгъажьэзэ зэхэщэгъэн фаеу алъытагъ. Сыда пIомэ лъыплъакIохэм янахьыбэр гъэсэныгъэм исистемэ иIофышIэх. Всероссийскэ партиеу «Партия Роста» зыфиIорэм и ЧIыпIэ къутамэ ипащэу Зэфэс Владислав зэрилъытагъэмкIэ, блэкIыгъэ хэдзынхэм лъыплъэкIуагъэхэр къэгъэнэжьыгъэнхэ фае.
Партиеу «Единэ Россием» и ЧIыпIэ гъэцэкIэкIо комитет ипащэу АфэшIэгъо Рэмэзан упчIэ пчъагъэмэ яджэуапхэр къаритыжьыгъ. Хэдзынхэр къызэрыкIохэу зэрэщымытыщтхэр, зиягъэ къэзыгъакIо зышIоигъохэр щыIэнхэ зэрилъэкIыщтыр, IэкIыб хэгъэгухэм хэдзынхэм лъэшэу анаIэ къазэратетыр къыIуагъ.
Общественнэ палатэм и Тхьаматэ игуадзэу Аннэ Крюковам къызэриIуагъэмкIэ, Конституцием пае цIыфхэм амакъэ аты зэхъум, зэкIэри тызэ-къотыгъ. Джы Iофыр нэмыкI, арышъ, ащ нахь тишъыпкъэу тыкъекIолIэн фаеу къыIуагъ.
Сихъу Гощнагъу.