Японием икъалэу Токио щыкIорэ Олимпиа­дэм Урысыем испортсменхэм дэгъоу зыкъыщагъэлъагъо.

Тыгъуасэ ехъулIэу медалэу къыхьыгъэхэм япчъагъэкIэ тихэшыпыкIыгъэ командэ яплIэнэрэ чIыпIэм щытыгъ. Ащ нахь лъагэу дэкIоен амали иI.

Анахьэу зигугъу къэпшIын фаер тигимнастхэр ары. Хъулъфыгъэхэми, бзылъфыгъэхэми (командэхэмкIэ) дышъэр къа­хьыгъ. Аужырэу мыщ фэдэ гъэ­хъагъэ зашIыгъэр бэшIэгъэ дэд.

Тиспортсмен цIэрыIохэу Евгений Рыловымрэ Климент Колесниковымрэ есынымкIэ апэрэ ыкIи ятIонэрэ чIыпIэхэр къыдахыгъэх. СэшхохэмкIэ София Поздняковам дышъэр къыхьыгъ, Со­фья Великаяр ятIонэрэ хъугъэ.

ТхэквондомкIэ тихэшыпыкIыгъэ командэ дышъэ медалитIу, зы тыжьын ыкIи джэрз къыхьыгъэх. Мы спорт лъэпкъыр олимпийскэ джэгунхэм защыха­гъэхьагъэм щегъэжьагъэу ащ фэдэ къэгъэлъэгъон тиспортсменхэм яIагъэп. ЩэрыонымкIи тиспортсменхэм медальхэр яIэх.

БэнэнымкIэ, боксымкIэ, есынымкIэ, гимнастикэмкIэ, атлетикэ псынкIэмкIэ, нэмыкIхэмкIи спортсменхэр джыри зэнэкъокъу­щтых. Урысыем ихэшыпыкIыгъэ командэ Олимпиадэр дэгъу дэдэу ригъэжьагъэшъ, арэущтэу лъигъэ­кIотэнэу тыщэгугъы.

Олимпийскэ джэгунхэм ащытекIуагъэхэм афэгушIуагъ Урысыем и Президентэу Владимир Путиныр.