Зыкъэзыгъэлъэгъуагъэхэр атхыгъэх
Адыгэ Республикэм хэдзынхэмкIэ и Гупчэ комиссие ия 12-рэ зэхэсыгъо джырэблагъэ иIагъ. Iофтхьабзэм упчIи 8-мэ ащыхэплъагъэх, унэшъо гъэнэфагъэхэр ашIыгъэх. АР-м хэдзынхэмкIэ и Гупчэ комиссие итхьаматэу Сэмэгу Нурбый зэхэсыгъом хэлэжьагъ.
Адыгэ Республикэм и Къэралыгъо Совет – Хасэм Красногвардейскэ ыкIи Теуцожь районхэмкIэ зы мандат зиIэ хэдзыпIэ коеу N 7-м идепутат хэдзыгъэнымкIэ зикандидатурэ къагъэлъэгъогъэ ПчыхьэкIэ Азэмат регистрациер шIыгъэным иIофыгъо къытегущыIагъ Гупчэм исекретарэу ХьацIэцIэ Фатимэ. Мы кандидатурэм комиссием хэтхэм дырагъэштагъ ыкIи ар къэзыушыхьатырэ удостоверениер А. ПчыхьакIэм ратыжьыгъ.
Адыгэ Республикэм и Къэралыгъо Совет — Хасэм Мыекъопэ районымкIэ зы мандат зиIэ хэдзыпIэ коим зыкъыщызгъэлъэгъогъэ Игорь Ческидовми илъэIу дырагъэштагъ ыкIи удостоверениер ратыжьыгъ.
Адыгэ Республикэм и Къэралыгъо Совет – Хасэм Красногвардейскэ районымкIэ зы мандат зиIэ хэдзыпIэ коеу N 6-м идепутат хэдзыгъэнымкIэ зыгъэзгъэлъэгъогъэ В. Митроновыр, джащ фэдэу Тэхъутэмыкъое районымкIэ зы мандат зиIэ хэдзыпIэ коеу N 20-м идепутатэу зыкъэзгъэлъэгъогъэ Дина Квасневскаяр регистрацие шIыгъэнхэу гупчэм иIофышIэу Афэунэ Рэмэзан зэхэсыгъом къахилъхьагъ.
Адыгэ Республикэм и Къэралыгъо Совет – Хасэм къалэу МыекъуапэкIэ зы мандат зиIэ хэдзыпIэ коеу N 9-м идепутат хэдзыгъэнымкIэ зикандидатурэ къагъэлъэгъогъэ Андрей Тугулуковым удостоверениер ратыжьыгъ.
ЫпшъэкIэ зигугъу къэтшIыгъэ хэдзын тедзэхэм языфэгъэхьазырын, Мыекъуапэ хэдзынхэмкIэ ичIыпIэ комиссие IофшIэныр зэрэзэхищэщтым фэгъэхьыгъэу къэгущыIагъэх Гупчэ комиссием исекретарэу ХьацIэцIэ Фатимэ ыкIи гупчэм ипащэ игуадзэу Елена Майор.
КIАРЭ Фатим.