Хабзэ зэрэхъугъэу, илъэс къэс шыухэу шъолъыр зэфэшъхьафхэм ялIы­кIохэр зыхахьэхэрэм хъугъэ-шIэгъэ зэмылIэужыгъохэм япхыгъэ Iоф­тхьа­бзэхэр зэшIуахых.

Хэгъэгу зэошхом текIоныгъэр къызыщыдахыгъэр илъэс 76-рэ зэрэхъугъэм фэгъэхьы­гъагъ Адыгеим, Къэбэртэе-Бэлъ­къарым, Къэрэщэе-Щэрджэсым, Краснодар краим къарыкIыгъэ шыу 50 фэдиз зыхэлэжьэгъэ Iофтхьабзэр. МэфиплIыим къыкIоцI ахэм километри 150-м ехъу зэпачыгъ, ТIопсэ районым ыкIи къалэу Шъачэ заом епхыгъэ чIыпIэхэу яIэхэм ащыIагъэх. ПсэупIэ пэпчъ митингхэр щыкIуагъэх, Хэгъэгу зэо­шхом хэкIодагъэхэм ясаугъэтхэм ахэм къэгъагъэхэр акIаралъхьагъэх.

— Хэгъэгум ишъолъыр пчъа­гъэ зэзыпхырэ хъугъэ-шIагъэхэм зыкIэ ащыщ хъугъэ «Созвездие Шагди — Шапсугия» зыфиIорэм къызэпичыгъэ гъогур. Къэбэртэе шы лъэпкъым щэIагъэу иIэр, ипытагъэ ащ фэдэ гъогууанэхэм язэпычын къегъэшъыпкъэжьы, ижъырэ шэн-хабзэхэм якъэухъумэн анаIэ зэрэтырагъэтырэри ащ къегъэлъагъо, — Адыгеим и ЛIышъхьэ Инстаграмым къы­ригъэхьагъ.

Адыгэ шыухэм яобществэу «Шыу Хасэм», хы ШIуцIэ Iушъом щыпсэурэ шапсыгъэхэм яобщественнэ организациеу «Адыгэ Хасэм» ыкIи Урысые дзэ-тарихъ обществэм мы Iоф­тхьабзэр зэрэзэхащагъэм пае зэрафэразэр КъумпIыл Мурат къыхигъэщыгъ.