Лъэпкъ проектэу «Щынэгъончъэ ыкIи шэпхъэшIухэм адиштэхэрэ гъогухэр» зыфиIорэм игъэцэкIэн къыдыхэлъытагъэу агъэцэкIэжьы республикэм икъэлэ шъхьаIэ иурамэу Привокзальнэм изы Iахь.

ПсэолъэшI IофшIэнхэр зыгъэцакIэрэр пшъэдэкIыжьэу ыхьырэмкIэ гъунэпкъэ гъэнэфагъэ зиIэ обществэу «Газобъект» зыфиIорэр ары. Непэрэ мафэм ехъулIэу гъогум телъ асфальтыр агъэкIэжьыгъ, тамыгъэхэр тырагъэуцуагъэх, нэмыкIыбэ зэшIуа­хыгъ. IофшIэнхэр процент 90-кIэ агъэцэкIагъ.

Джащ фэдэу лъэсрыкIо гъогукIэхэри ашIыгъэх, машинэхэр зыдагъэуцущтхэ чIыпIэхэм ахагъэхъуагъ. Ар цIыфхэмкIэ Iэрыфэгъу хъущт.

Шъугу къэдгъэкIыжьын, 2021-рэ илъэсым лъэпкъ проектэу «Щынэгъончъэ ыкIи шэпхъэшIухэм адиштэхэрэ гъогухэр» зыфиIорэм игъэцэкIэн къыдыхэлъытагъэу Мыекъуапэ игъогухэм яIахь 18-мэ игъэкIотыгъэ гъэцэкIэжьынхэр ащыкIощтых. Ахэм ащыщэу 5-р – республикэм икъэлэ шъхьаIэ къыпэблэгъэ псэупIэхэм ахэ­хьэх. Мы гухэлъым сомэ миллиони 190-м ехъу пэIуагъэхьащт. Проектыр гъэцэкIагъэ зэрэхъурэм ынаIэ тет Адыгэ Республикэм и ЛIышъхьэу КъумпIыл Мурат.

Мы лъэпкъ проектым Адыгеир чанэу хэлажьэ, къэгъэлъэгъонэу иIэхэр зэрэдэгъухэм къыхэкIэу мылъку тедзэ къыфатIупщэу къы­хэкIыгъ. Ащ ишIуагъэкIэ гъогухэм игъэкIотыгъэ гъэцэкIэжьынхэр ащыкIуагъэх, зэтырагъэпсыхьагъэх, ящыкIагъэхэ тамыгъэхэр атырагъэуцуагъэх. Непи а IофшIэныр республикэм щылъагъэкIуатэ.

Федеральнэ гупчэм зэгурыIоныгъэ дыряIэу Iоф зэрэдашIэрэм, партиеу «Единэ Россиер» Iэпы­Iэгъу къазэрэфэхъурэм ишIуагъэ­кIэ инфраструктурэм, зэтегъэ­псыхьаным япхыгъэ Iофыгъуабэ шъолъырым щызэшIуахы.

Шъолъырым игъогухэр щынэгъончъэу щытынхэм, хъугъэ-шIагъэхэм япчъагъэ нахь макIэ шIыгъэныр ары проектым пшъэ­рылъ шъхьаIэу иIэр. Ар респуб­ликэм зэрифэшъуашэу щагъэцакIэ.