КъокIыпIэм щыпсэурэ лъэпкъхэм яискусствэ и Къэралыгъо музей икъутамэу Мыекъуапэ дэтым ипащэу ШъэуапцIэкъо Аминэт ковидым пэуцужьырэ вакцинэр мы мафэхэм аригъэшIыгъ.

- Ащ ыпэкIэ сысымэджагъэу къасшIэрэп, ау анализыр зысэшIым антителэхэр бэкIаеу сиIэхэу къычIэкIыгъ. Арэу щытми ахэр тIэкIу нахь макIэ зэхъухэм прививкэ язгъэшIыгъ.

Сэ сизакъоп, IофшIапIэм Iутхэми ашIы, шъыпкъэ, зэкIэми зэдашIынэу хъурэп, IофшIэныр къызэтеуцо хъущтэпышъ. Джырэблагъэ зэкIэ тиIофышIэхэм анализхэр атыгъэхэу, куп-купэу прививкэ ятэгъэшIы. Вакцинэр зыхябгъэлъхьан зэрэфаер зэкIэми къагурэIо, сыда пIомэ мы узым ыпкъ къикIэу чIэнэгъэшхо коллективым ышIыгъ.

Музеир цIыф кIуапI, къэгъэлъэгъонхэр зэхэтэщэх, ахэм къякIуалIэхэрэм таIокIэ, арышъ, тэри зытыухъумэжьын, цIыфми тафэсакъын фае, - еIо музеим ипащэ.

Сихъу Гощнагъу.