УФ-м и Президентэу Владимир Путиным министрэхэм я Кабинет изэхэсыгъоу тхьамэтагъор зыщызэрихьагъэм гъомылапхъэхэм ауасэ зэрэдэкIуаерэм иIоф къыщиIэтыгъагъ.

КIымэфэ-гъэтхэ уахътэхэм хэтэрыкIхэм ауасэ хахъоу ха­бзэ, ау мыгъэ нахьыпэрэхэм анахь хэпшIыкIэу дэкIоягъ, гъэмафэм иятIонэрэ мазэ екIы нахь мы­шIэми, къыщыкIэжьырэп. Ар узгъэгумэкIын, Iоф зыдэпшIэн фэе Iофыгъоу зэрэщытыр къэралыгъом ипащэ къыхигъэщыгъ. УФ-м и Премьер-министрэ игуадзэу Виктория Абрамченкэм къызэриIуагъэмкIэ, адрэ гъэхэм афэмыдэу, мыгъэ нахьыжьэу Iэ­кIыб къэралыгъохэм къаща­гъэкIыгъэхэ хэтэрыкIхэмрэ пхъэ­шъхьэ-мышъхьэхэмрэ тадэжь къыращагъэх. Дунэе бэдзэршIыпIэм гъомылапхъэхэм ауасэ зэ­рэщыдэкIоягъэм ыпкъ къикIыкIэ, мыщи лъапIэу щыIуагъэкIых.

Шъолъырхэм ащыщыбэм хэтэрыкIхэр ащаугъоижьынхэу зэ­рэрагъэжьагъэм Iофхэр на­хьышIу къышIынхэу зэрэщыгугъыхэрэр Вице-премьерым къы­хигъэщыгъ. Джы а продукциер къыщэфымэ, ыуасэ хигъахъозэ IузыгъэкIыжьыхэрэ сатыушIхэр азыфагу къимыхьэхэу, къэзгъэ­кIыгъэхэм ащэжьын амал ятыгъэным зэрэпылъхэр къыIуагъ. Ащ пае щэпIэ сетишхохэм зэзэгъыныгъэхэр адашIых. Шъо­лъырхэм ермэлыкъхэр нахьыбэу ащызэхащэнхэу Правительствэм пшъэрылъ фишIыгъ.

Владимир Путиным предложениехэм адыригъэштагъ.

— Мэкъумэщ продукциер къэзыхьыжьыгъэм IуигъэкIыжьы­нэу амал етыгъэныр, щэпIэ чIы­пIэхэр къызIэкIэгъэхьэгъошIу афэшIыгъэныр шIокI зимыIэ Iоф. Ащ фэдэ чIыпIэхэр афэ­гъэпсыгъэнхэ фае. ЕрмэлыкъкIэ шъуфаеми шъуядж, ау нахь чанэу мыщ Iоф дашъушI, охътабэ тешIэнэу щытэп, — къыIуагъ Президентым.