Партиеу «Единэ Россием» ишъолъыр къутамэ гъомылапхъэхэм ауасэ лъыплъэгъэным фэгъэзэгъэ IофшIэкIо купым унашъо зэрэфишIыгъэм тетэу Мыекъуапэ иурамэу Советскэм щыкIорэ ермэлыкъым иIофшIэн ригъэжьэжьыгъ.

КIэщакIохэм къызэраIорэмхэрэм бэдзэр уасэхэм нахь пыутэу гъомылапхъэхэр къыз­IэкIагъэхьанхэ алъэкIыщт.

Пандемием ыпэкIэ Мыекъуа­пэ имызакъоу, республикэм имуниципальнэ образованиехэм зэкIэми ермэлыкъхэр ащыра­гъэкIокIыгъэх, цIыфхэм яшIуа- гъэ арагъэкIыным республикэм ипащэхэр пылъых. Социальнэ мэхьанэ зиIэ гъомылапхъэхэр нахь пыутэу цIыфхэм къаIэкIэ­хьанхэм мы Iофтхьабзэр фэIорышIэ.

Анахьэу борщыр зыхашIы­кIырэ хэтэрыкIхэу картофым, бжьыным, пхъым, къэбаскъэм ыкIи гыныплъым ауасэ хэпшIыкIэу къызэрэдэкIоягъэм бэмы­шIэу АР-м и Правительствэ щыкIогъэ зэхэсыгъом щытегущы­Iагъэх. Ахэм ауасэ къегъэIыхыгъэнымкIэ ащыгъум амалышIоу алъытагъ ермэлыкъэу зэхащэхэ­рэм япчъагъэ хэгъэхъогъэныр.

«Мэкъумэщ продукцием ­ыуа­сэ зыпкъ итыным фэшI къэ­лэ гупчэм щыредгъэкIокIырэ ермэлыкъым иIофшIэн едгъэ­жьэжьыгъ. Уасэхэм талъэплъэ ыкIи шъолъыр пащэхэр щытэгъэ­гъуазэх. Джащ фэдэу цIыфхэм нахь Iэрыфэгъу къафэхъуным фэшI мыщ фэдэ ермэлыкъхэр Мыекъуапэ ирайон цIыкIухэм ащызэхэтщэн гухэлъ тиI. Мэ­къумэщ гъомылапхъэхэр къыдэзыгъэкIыхэрэм занкIэу япродукцие IуагъэкIынымкIэ ермэлыкъыр амалышIоу щыт ыкIи сатыушIыпIэхэм нэкъокъогъу афэхъухэзэ уасэми нахь къыкIырагъэчын алъэкIыщт», — къыIуагъ Мыекъопэ къэлэ адми­нистрацием ипащэ иIэнатIэ зыгъэцэкIэрэ Сергей Стельмах.

БлэкIыгъэ шэмбэтым къэлэ гупчэм щыкIогъэ ермэлыкъым продукцие зэфэшъхьафхэр къы­дэзыгъэкIырэ предприятие 50 фэдиз хэлэжьагъ. Ахэм лыр, пцэжъыер, щэм ыкIи хьаджыгъэм ахэшIыкIыгъэ шхыныгъо­хэр, хэтэрыкIхэр, пхъэшъхьэ­-мы­шъхьэхэр, нэмыкIхэри къыращэлIагъэх.

ПредпринимательствэмкIэ ыкIи потребительскэ бэдзэрымкIэ ГъэIорышIапIэм иIо­фышIэхэм къызэраIуагъэмкIэ, тхьамафэ къэс мыщ фэдэ ермэлыкъхэр республикэм игупчэ щызэхащэщтых.

Мыщ фэдэ Iофтхьабзэхэр зэхэщэгъэнхэм мэхьанэшхо зэ­ри­Iэр, ащ цIыфхэми, предпринимательхэми яшIуагъэ къызэрякIырэр пчъагъэрэ къыхи­гъэщыгъ Адыгэ Республикэм и ЛIышъхьэу КъумпIыл Мурат. Ер­мэлыкъэу рагъэкIокIыхэрэм зэкIэми рес­публикэм ипащэхэр сыдигъуи ахэ­лажьэх, уасэхэр зыфэдэхэр, продукциеу къыращалIэрэм изы­тет зэрагъашIэ, щыкIагъэу щыIэ­хэр янэплъэгъу рагъэкIыхэрэп.

Ермэлыкъэу Мыекъуапэ щыкIуагъэм джыри зэ нафэ къы­шIыгъ продукцием ыуасэ зыпкъ итыным мы Iофтхьабзэр зэ-­ рэ­фэIорышIэрэр. Предприни­мательхэу ермэлыкъым хэлэ­жьагъэхэм ашъхьэкIэ аушэтын алъэ­кIыгъ хэгъэхъуагъэ имыIэу япродукцие защэкIэ, ар дэгъоу зэрэIукIырэр.

Джащ фэдэу тикъэлэ шъхьаIэ щыпсэухэрэм ыкIи хьакIэхэм бэдзэрым щыIэ уасэхэм анахь пыутэу гъомылэпхъэ зэфэ­шъхьаф­хэр ермэлыкъым щащэфынхэ алъэкIыгъ, ахэм ядэ­гъугъэ щэфакIохэм мы чIыпIэм щауплъэкIун амал яIагъ.

Ермэлыкъым щыIа­гъэ­хэм ащыщ пенсионеркэу Зинаида Корсун:

— Мыщ фэдэ ермэлыкъхэм мэхьанэшхо яIэу сэлъытэ. Сыда пIомэ пенсионерхэм, зигъот макIэхэм ящыкIэгъэ гъомылапхъэхэр нахь пыутэу зэрагъэгъотын амал яI. Мы аужырэ ермэлыкъэу зэхащагъэм хэтэ­рыкIхэр, щэр, нэмыкIхэри нахь пыутхэу щысщэфыгъэх. АщкIэ зэхэщакIохэм сафэраз.

ГъукIэлI Свет: — Тикъэлэ шъхьаIэ щызэхащэрэ ермэлыкъхэм сащэщафэ. Бэдзэрым нахьи щакIохэр нахь къыпфэчэфхэу мыщ къыщыппэгъокIых, уасэхэри зыпкъ итых, продукциеу къыращалIэрэм идэ­гъугъи уигъэрэзэнэу щыт. Мыщ фэдэ ермэлыкъхэр нахьыбэрэ зэхащэхэмэ, къэлэдэсхэмкIэ тигопэщт, предпринимательхэмкIи ар федэу сыхаплъэ.

КIАРЭ Фатим.