Сомэ миллион 37,7-рэ пэIуагъэхьащт
Лъэпкъ проектэу «Щынэгъончъэ ыкIи шэпхъэшIухэм адиштэрэ автомобиль гъогухэр» зыфиIорэм ишIуагъэкIэ республикэм игъогухэм ащыщхэр агъэцэкIэжьыгъэх, агъэкIэжьыгъэх, ящыкIэгъэ тамыгъэхэр атырагъэуцуагъэх.
Мыекъопэ агломерацием къыдыхэлъытагъэу къутырэу Косиновым екIолIэрэ гъогум игъэцэкIэжьын епхыгъэ IофшIэнхэр аухых. Километри 4 фэдиз зикIыхьэгъэ гъогум изэтегъэпсыхьан фэгъэзагъэр Шэуджэн ДРСУ-р ары. Адыгеим псэолъэшIынымкIэ, транспортымкIэ, псэупIэ-коммунальнэ ыкIи гъогу хъызмэтымкIэ и Министерствэ къызэрэщаIуагъэмкIэ, псэуалъэм игъэцэкIэжьын сомэ миллион 37,7-рэ пэIуагъэхьащт.
ГъэцэкIэжьынхэр зыщыкIорэ чIыпIэм щыIагъэх ыкIи IофшIэныр зэрэлъыкIуатэрэм зыщагъэгъозагъ «Адыгеяавтодорым» илIыкIохэм. Лъэныкъохэм зэзэгъыныгъэу зэдашIыгъэр шIокI имыIэу гъэцэкIэгъэн зэрэфаем дакIоу, гъогу лабораторием икъулыкъушIэхэм асфальтым изэхэлъыкIэ зэрагъэшIэнэу ащ изы Iахь ауплъэкIунэу аштагъ.
— Гъогум тыралъхьэрэ асфальтыр шапхъэхэм адиштэным, IофшIэнхэр зэрифэшъуашэу зэхащэнхэм ренэу тылъэплъэ, — къыIуагъ «Адыгеяавтодорым» иотдел ипащэу Роман Верзуновым.
Джащ фэдэу, лъэпкъ проектэу «Щынэгъончъэ ыкIи шэпхъэшIу-хэм адиштэрэ автомобиль гъогухэр» зыфиIорэм игъэцэкIэн къыдыхэлъытагъэу джырэ уахътэм зэтырагъэпсыхьэ Адыгеим икъэлэ шъхьаIэ иурамэу Привокзальнэм изы Iахь. Непэрэ мафэм ехъулIэу ар процент 90-кIэ гъэцэкIагъэ хъугъэ.
— Гъогур зэрэдгъэкIэжьыгъэм дакIоу, машинэхэр зыдэбгъэуцун плъэкIыщт чIыпIэхэм ахэдгъэхъуагъ, промышленнэ предприятиехэм ыкIи къэлэ къэхэлъэжъым якIолIэрэ лъэсрыкIо гъогухэр дгъэпсыгъэх, — къы-щаIуагъ «Адыгеяавтодорым».
Инфраструктурэм епхыгъэ Iофыгъохэм язэшIохын республикэм мэхьанэшхо щыраты. ЫпшъэкIэ зигугъу къэтшIыгъэ лъэпкъ проектыр анахь дэгъоу зыгъэцэкIэрэ шъолъырхэм Адыгеир ащыщ. БлэкIыгъэ илъэсым гъогу километрэ 50,6-рэ агъэцэкIэжьыгъ, непи а IофшIэныр лъагъэкIуатэ.