Адыгэ Республикэм и ЛIышъхьэу КъумпIыл Мурат ипшъэрылъкIэ гъомылапхъэхэм ауасэ мониторинг шIыгъэным фэгъэзэгъэ IофшIэкIо купым зэхэсыгъоу иIагъэр зэрищагъ АР-м и Премьер-министрэу Геннадий Митрофановым.

Iофтхьабзэм хэлэжьагъэх рес­публикэм ивице-премьерэу Сапый Вячеслав, АР-м экономикэ хэхъоныгъэмкIэ ыкIи сатыумкIэ иминистрэу Шэуджэн Заур, Адыгеим мэкъу-мэщымкIэ и Министерствэ ипащэ игуадзэу Сергей Шопиныр, монополием пэшIуекIогъэнымкIэ федеральнэ къулыкъум республикэм и Гъэ­IорышIапIэ, Адыгеястатым, муниципалитетхэм ялIыкIохэр.

Iофыгъо шъхьаIэу зытегущыIагъэхэр шъолъырым икъалэхэм ыкIи ирайонхэм ермэлыкъхэр ащызэхэщэгъэнхэр ары. Мыщ яIофшIэн рагъэжьэжьыным кIэщакIо фэхъугъ партиеу «Единэ Россием» ишъолъыр къутамэ.

Партием ишъолъыр гъэцэ­кIэкIо комитет ипащэу АфэшIэгъо Рэмэзан къызэриIуагъэмкIэ, мэкъумэщ продукциер къыдэзгъэкIыхэрэр бэдзэрхэм ащыщэнхэ амал яIэнымкIэ Iофыр къафагъэпсынкIэщт, ащ дакIоу рес­­публикэм щыпсэухэрэм бэдзэр уасэхэм анахь пыутэу гъомылапхъэхэр къызIэкIагъэ­хьанхэ алъэкIыщт.

Мыщ ыпэкIэ «Единэ Россием» иплощадкэ щызэхащэгъэ зэхэсыгъом УФ-м и Правительствэ ыкIи шъолъырхэм япащэхэр хэлэжьагъэх. Борщыр зыхашIыкIырэ хэтэрыкIхэм ауасэ къегъэ­Iыхы­гъэнымкIэ шIэгъэн фаехэм ахэр атегущыIагъэх. АщкIэ ама­лы­шIоу алъытагъ ермэлы­къэу зэхащэхэ­рэм япчъагъэ хэгъэхъо­гъэныр.

Партийцэхэм ыкIи Правительствэм хэтхэм къахьыгъэ предложением Урысыем и Президентэу Владимир Путиным ды­ри­гъэштагъ. Ащ епхыгъэу шъо­лъырхэм япащэхэм пшъэрылъ гъэнэфагъэхэр афишIыгъэх.

Гъомылапхъэхэм ауасэ къегъэIыхыгъэныр Iофыгъо шъхьаIэу зэрэщытыр, ащ фэдэ пшъэрылъ республикэм и ЛIышъхьэ ыкIи федеральнэ пащэхэм къызэрагъэуцурэр къыхигъэщыгъ Геннадий Митрофановым. Ащ къыхэ­кIыкIэ сатыушIыпIэ чIыпIэхэм зэрахэбгъэхъон фаем дакIоу, шъолъырым ит предприятие инхэм, гъомылапхъэхэр оптэу зыщэхэрэм Iоф адэшIэгъэным мэхьанэшхо иIэу ылъытагъ.

Непэрэ мафэм ехъулIэу сатыушIыпIэ чIыпIэ 4620-рэ зиIэ ермэлыкъ площадкэ 45-рэ рес­публикэм щагъэпсыгъ, илъэсыр къызихьагъэм щыублагъэу ермэ­лыкъ 650-рэ зэхащагъ.

Адыгеим и ЛIышъхьэ ипресс-къулыкъу